التربية الاساسية وتخصص المكتبات بين السلبيات والايجابيات ♥ :

السلام عليكم ورحمة الله♥

. . حيل انسأل سارة وين تدرسين؟ شنو تخصصج؟ شلونه؟ وشكثر اسئلة p;

قلت اقرق فوق راسكم هههههه

 للي يهمها الموضوع او مفكرة تدخل الكلية وخريجات ٢٠١٥ خصوصاً♥

الله يوفقكم جميعاً و يارب تحققون كل اللي تتمنونه :*

بالبداية نهائياً ماكنت متوقعة في يوم ان ممكن ادخل هالكلية خصوصاً

وتحديداً كلية التربية سواء تطبيقي او جامعة الكويت

لأني ما اشوف نفسي معلمة..و ما احس انه مجالي

خصوصاً ما اعرف اقسى على طالبة او ارفع صوتي عليها

اضعف صراحة قدامهم هههههه

ما اقول ان كل الابلات يرفعون صوتهم او شي..لا بالعكس

بس اغلب اللي مروا علي كانوا جذي p;

صج ان فهمت هالشي بعدين انها محاولة منهم ان يثبتون شخصيتهم 

ومايسمحون لأي طالبة انها تبدي حوارات لمجرد الفضول او اي شي ثاني

بس همّ تظل المعلمة الاكثر تأثيراً على الطالبات..سواء بالايجاب او بالسلب

فاللي تشوف نفسها بعيدة عن هالشي..اختاري مجال يستهويج

ابداً لا تفكرين بالمعاش + العطل او اي شي ثاني p;

مثل ما الكل يفكر بهالشي وصار ضغط عالوزاره ههههه

< شفيني طلعت عن الموضوع؟ :|

ايي اقولكم :P

من التخصصات اللي كنت اعشقها اعشقها حيل.. كان علم النفس وعلم الاجتماع♥♥ -اثنين في واحد ههههه-

كانت من اهم امنياتي اللي حاولت احققها بس ما الله كتب p;

قدمت على جامعة الكويت اول ماتخرجت سنه ٢٠١١

بس كنت من الـ ٣٠٠٠ طالب اللي انرفضوا - لو تذكرون :$ -

لان كانت وقتها زحمة على الجامعة فوق المتوقع..وكنت راضية لو انقبل ب اي تخصص

واحول لعلم النفس او الاجتماع،كنت راضيه فيهم الـ٢♥

ظليت كورس بالبيت..كنت متحطمة وحسيت ان عمري ماراح ادخل هالتخصص

و ماراح اكون اخصائية نفسية

شفت شنو عندي خيارات ثانية وحاولت ادور هالتخصص في جامعات او كليات ثانية

و ماحصلت للأسف..وبديت اسأل نفسي شنو في تخصص راح ابدع فيه؟

شفت نفسي قريبة للتصميم الداخلي - ديكور -

و احب الديكور وممكن هالمجال يفتح لي واجد اشياء وافيد نفسي وافيد اللي حولي

و الوظيفة مو محتكرة على التربية بس

ممكن اشتغل في كذا مكان اكون فيها اخصائية ديكور -مو مهندسة ترى p;-

قدمت على كلية التربية الاساسية - واضح انقرصت من الجامعه ههههههه -

ماحبيت اجازف وارجع اقدم وممكن انقبل وممكن لا ويضيع علي كورس ثاني!

كانت رغباتي اربع :

١- التصميم الداخلي

٢- مكتبات

٣- تربية اسلامية

٤- اللغة العربية

قدمت امتحان القدرات -كنت متدربة حبتين بالبيت بس كل الكلام اللي سمعته عن الامتحان غير -

*لا تسمعين كل شي من البنات وتصدقينه،اسألي الجهات المختصة او روحي لدكتور التخصص واسألية بنفسج شنو طبيعة الاختبار وشلون اتدرب....ابداً مو غلط*

كان الامتحان رسم ثلاثي الابعاد لمكتبة بأرففها واناراتها وارضيتها وكتبها..الخ

شنو انصدمت وقتها ههههههه . . كان علبالي بس شكل ثلاثي ابعاد وبس

*بصراحة كنت متدربة على مربع ودائرة ثري دي هههههههه متعبه نفسي ادري :$*

فجبت العيد...كان بأمكاني انجح بالواسطة مثل الباقي

بس ماحبيت ابدي حياتي الجامعية بواسطة وممكن ما اقدر اعدي هالتخصص ولا ابدع فيه

واكتشف ان اصعب من اللي متوقعته! و ممكن أخذ كرسي بنت أحق مني وجابت الاختبار بمجهودها♥!

قبلوني بتخصص المكتبات

كنت حاطته وماكان عندي اي خلفية عنه ولا فكرت ان ممكن يقبلوني فيه

وهذي غلطة لازم تنتبه منها اي خريجة!♥

لا تحطين رغبة لمجرد ملئ فراغ مثلي وتكونين واثقة ان راح يقبلوني بالرغبة الاولى

كنت حاطته لمجرد اني احب القراءة بس ترى هههههه

مرت الـ٣ سنين بالتخصص..والى يومكم ماحبيته

تقبلته أكثر صح،عرفته عن قرب اكثر..اكتشفت ان التخصص مظلوم

وقليل جداً احد يدخله عن حب....لان محد يعرف شنو هالتخصص و شنو يخدم!

اغلب اذا مو كل اللي مختارينه..عشانها وظيفة مريحة،بس!

انا ضد اني اختار التخصص عشان الوظيفة..صح ان لازم افكر بالراتب وجهة العمل

بس ما اخليه شغلي الشاغل ويكون هدفي الاساسي اني اختاره عشان اقعد بطالية!

شعب يحب الربادة p;

- ما اقصد التعميم بس اغلب الناس تبي معاش وماتبي تشتغل!-

انا انسانة اقدر العمل بشكل...ومؤمنة ان الوظيفة رسالة ♥ مو مجرد استلم راتبي آخر الشهر وبس

مو مجرد اداوم عشان اجامل مديري او مسؤولي بالعمل..وما اعمل بجهد او ضمير

مهما كانت ماهية الوظيفة...هي رسالة بالاخير

سواء كنتي معلمة او حتى ادارية او اي وظيفة ثانية♥

من الاشياء اللي ماخلتني اتقبل التخصص بالبداية..صورته عند الناس

انها مجرد تنظف الكتب من الغبار او ترتبهم!

و صورة امينات المكتبة من المتوسط الى الثانوي ماتغيب عن بالي

ماعمري شفتهم يشتغلون..بس قهوة وجاي وانواع الحلويات!

او تكون "مطراش" للناظرة او الوكيلة p;

وسوري على الكلمة بس هذي كانت الحقيقة اللي شفتها بالثانوي خصوصاً

و ما اتوقع هالصورة راح تختفي بسهولة ببال العموم

مو قصدي اقلل من قيمة الوظيفة بالعكس

امين المكتبة من انبل الوظائف بالعالم...وشي كبير جداً عند الغرب

ويعتبرون امين المكتبة من الناس المثقفة جداً وله مكانة كبيرة عندهم

بس بالمقابل عندنا؟؟ 

بديت اطنش هالافكار واركز اكثر بدراستي..واحاول اتقبله كثر ما اقدر عشان انجح فيه بمعدل مرتفع

يدخلني جامعة الكويت دراسات عليا واكمل ماستر علم نفس♥

وهالشي الوحيد اللي مصبرني صراحة p;

كلية التربية الاساسية :

كلية من كليات المعهد التطبيقي موقعها بالعارضية..تخصصاتها مختلفة منها

-اللغة الانجليزيه والفرنسيه والعربيه،التربية الاسلامية،التربية الخاصة (عربي-اسلامية)،اقتصاد منزلي

رياض اطفال،تصميم داخلي،تربية موسيقية،رياضيات،علوم،حاسوب، كهرباء

< ان شاء الله مانسيت تخصصات p;

الحلو بالكلية انها للبنات بس..وتخصصاتها متنوعة اكثر من كلية التربية جامعة الكويت

و من السهل يقبلونج ب اي رغبة حاطتها..مايردون احد ابداً p;

اخر كلاس الساعة ٧ بالليل..فاللي ليلية نفسي وماتحب قعدة الصبح هههههه

تقدر تضبط جدولها من العصر للمغرب p;

من اسلب السلبيات < اسلب :| هههههه

التسجيل سيئ سيئ سيئ . . إلى ابعد حد

مرت على كورسات اداوم على ثلاث مواد وهالشي أأخر تخرجي حيل :(

دايماً الشعب مغلقة..ويعطون مواعيد للتسجيل لمجرد يقهرونج بس :)

< قلبي متروس ههههههه

يروح يومج كله وتتعطل كل مشاويرج عشان بس التسجيل

و آخر شي ؟؟ كل الشعب مغلقة . . تطقين درب الصبح بهالشمس تكلمينهم ماكو فايدة

دايماً مو من صلاحياتنا نسجل لج مواد! :|

او

غيرج يداوم على مادة وحدة وراضي! :|

هذا قرارها..يمكن عندها ظروف وماتقدر تداوم كل يوم او ماتحب تضغط على نفسها

يقبلون طالبات بالآلآف...و مو موفرين لهم مواد

فيا المستجدة تآخذ مادة المستمرة او المستمرة تآخذ مادة المستجدة

وبطتنا بطت بطن بطتكم هههههه

فلو حابة تخصص موجود بجامعة الكويت...اشتري راحة بالج وقدمي على الجامعة p;♥

نصيحة لقلبج p;♥

اختاري التخصص اللي تشوفين نفسج فيه او تحسين ان ممكن تتقبلينه وتتعايشين معاه

وتهيئين نفسج على الوظيفة من خلال حتى دراستج♥

لا تتأثرين بكلام الناس...معاش هذا اقوى،اجازات مع الناس او اي مزايا

او ممكن تكون مزايا p;

ابداً محد راح يعيش معاج وظيفتج غيرج انتي..ولا احد راح يتحمل المسؤولية غيرج انتي

ولا احد راح يبدع او يساعدج في كل مرة!

وقبل ماتدخلين اي تخصص اسألي عنه عند الناس الصح

لا تسألين البنات كلش..لان كل بنت نظرتها غير وكل بنت راح تقولج رأيها من نظرتها هي

لا تتأثرين بأي شي،قبل ماتتخرجين روحي الكلية مري الاقسام اسألي

وصدقيني الدكتور راح يكون شفاف وصريح معاج وبيساعدج كثر مايقدر

لان كان بمكانج بيوم من الايام♥!!

ولو صرتي بمثل موقفتي..اقبلوج بتخصص ماكنتي عارفه عنه اي شي

حاولي تحطين هدف ثاني من بعد هالتخصص♥

فيديو فادني بشكل..للدكتور طارق السويدان♥

للاسف شفته بعد فوات الاوان...بس هم راح نخلق الفرصة للابداع

وتحقيق الاهداف :*!!

ضروري تشوفونه♥

والجميلة اللي داخله من الفون..شوفي : هون ♥

و في جزء ثاني همن :*

الله يوفقكم يارب ويكتب لكم الخير♥

ان شاء الله اكون فدتكم لو حبتين p; . . و انا حاضرة لأي سؤال :*

13 comments reviews, university