. . "إن اكرمكم عند الله اتقاكم"♥ *شويّه سواليف*

**

السلام عليكم و رحمة الله و بركاته♥

. . "إن اكرمكم عند الله اتقاكم"

* منو حنا عشان نقيّم دين الشخص أو مذهبه و نقول رأينا فيه؟

* منو حنا عشان نحتقر أو ننتقد -بطريقة غلط- ديانة إي شخص يمر ب حياتنا؟

* ما يمكن هالشخص يكون اقرب لله منّا؟

* ما يمكن هالشخص يكون أفضل من كثير اشخاص مروا ب حياتك؟

الدين أو *المذهب* ماهو مقياس لـ شخصية الواحد أو اخلاقه : )♥

. . كنت اشوف ب إنستغرام اكاونت لـ لوكات الفنانات

على أساس يكون الإنتقاد أو المدح لملابسها+شعرها+مكياجها

أو إي شي ثاني يتعلق بـ مظهرها الخارجي : )

لكن إنصدمت إن اغلب الإنتقادات لـ مذهبها !!!!

و بطريقة احتقار مو طبيعيه :/!

طيب المغزى أو الهدف من الصورة وين راح ؟

خلاص انتقدتي؟ نزلتي من نفسج لهالمستوى استانستي جذي؟

هالفنانة شافت كلامج و تابت خلاص؟

المشكلة . . إن ماله إي فايدة

يعني لا اللي شافوا هالكومينت استفادوا من نظريتج العبقرية هاذي

و لا اللي ناطرين يشوفون انتقادج لـ لوك الفنانة استفادوا

إلا إنج زدتي العنصرية أكثر و أكثر للأسف !!

إذا كان الشخص غير عن مذهبك مو معناته هو غلط

مو معناته هو اسوء شخص بالكون !!

*إنت اللي اسوء شخص بالكون إذا فكرت بهالطريقة : )*

طيّب ما كلنا نحب ديننا اللي الله خلقنا عليه بالفطرة الحمدلله♥

و نحب الإسلام..ونتمنى إننا نمثله بـ طريقة صح كثر مانقدر !

العنصرية ابداً ماهي من الإسلام..و أمرنا الله و رسوله عليه ألف الصلاة و السلام بالإبتعاد عنها

لإنها نتنه . . إلا مافي انتن منها ابداً!

للأسف إن هالتصرفات تطلع من مجتمع مسلم

للأسف إن نحتاج نتكلم عن هالنقطة ونرد نتكلم مرة مرتين ثلاث !

شي مُحزن :(

* كثير منا يسمع :

إن هالخادمة أو السايق ما اخذ معاشه لمدة 4-5 شهور و احياناً توصل إلى سنة

ليه؟ عشانه مو عربي؟

ليه؟ مو نفس؟ مو إنسان حاله حالك؟

ليه ماتعب و يحتاج معاشه؟

ليه اهله مايحتاجون يرسل لهم عشان يعيشون حياة كريمة؟

طيّب حط نفسك مكانه,تقضي مشاوير البيت من مدارس,جامعة..سوبر ماركت,سوق

من النهار احياناً إذا ماكان غالباً لي بالليل

راح تتحمل؟

راح تسكت من غير ماتتحلطم؟

راح تصبر؟

راح تكون مُبجر تشتغل و تودي و تجيب و ماتقول إلا حاضر؟

طيّب تعالي إنتي ياللي ماتعاملين الخدامة إلا بسب وقذف و احياناً ضرب

. . ليه؟ بالله تقدرين تصبرين لمدة سنتين بس تدورين بهالبيت إللي شكبره 

تنظفين تغسلين تكوين تطبخين.. إلخ إلخ

تقدرين؟

ما أتوقع : )

طيب ليه اصلاً تعاملينها بهالمعاملة؟

الدين معاملة يا أختي♥♥

ماتعرف تشتغل علميها..ماتعلمت حاولي فيها

إذا كلش كلش خلاص وديها المكتب !!

ما أقول خلاص لاتكونين حازمة معاها أو جادة ب شغل البيت

الوسطية حلوة ب كل شي

. . ابتسمي لها : ), ساعديها♥

ترى حتى لو شلتي صحن و وديتيه لها المطبخ راح تفرح!

لإنج وفرتي عنها إنها تروح غرفتج أو الصاله عشان تلم و تشيل♥

وفرتي وقت..وفرتي تعب

فكري إنج راح تدخلين سرور على قلب مسلم♥

و حتى لو ماكانت مسلمة..يكفي إنج تمثلين الاسلام لها ب أحسن صورة

و ممكن من تصرفاتج حتى تسلّم♥!

ياسللللااام,شنو أجمل من إنج تدخلين شخص للإسلام؟♥♥♥

خدامة رفيجتي..كانت مجوسية -تعبد النار و العياذ بالله-

كانوا يعاملونها أحسن معاملة,لدرجة إذا شروا شي من السوق يجيبون لها مثلها♥!

مخلينها وحدة من بناتهم..خصوصاً إنها كانت بعمر بناتهم فعلاً

يطلبون من مطعم؟ من أول الناس اللي يسألونها شمشتهيه؟

حتى تجبرهم ساعات يطلبون من مطعم هندي عشان تبيه P:

لكن إجبار حلو..إجبار إنساني..إجبار مافي أحلى منه فعلاً!

. . . جتهم في يوم و قالت لهم "أنا ابي اصير مسلمة"

ما تتخيلوا شلون كانوا فرحانين إنهم قدروا يخلونها تسلم ب طريقة مو مباشرة

أو حتى إنها ماكانت نيتهم , ماكان ودهم إلا إنهم يمثلون الإسلام ب طريقة مافي أجمل منها♥

سافرت, و اتصلت على أم رفيجتي تبشرها ب إن اهلها اسلموا!♥♥♥♥

يارباااااااااااه♥

في أجمل من هالشي بس؟

بالاخير هم بشر

خلوا ديرتهم و اهلهم عشان لقمة وعيشة كريمة

رفقاً بهم♥

*موقف ثاني:

وحدة من الأمهات مثلها مثل غيرها كانت رايحة لأجتماع أولياء الأمور بمدرسة بنتها

. . أم مهتمة لمستوى بنتها بالدراسة,برافو!

*شي يمكن يكون في يوم من الايام مُفتقد*

ماعلينا

. . شافت البنت أمها وجتها طايرة هي وصديقتها اللي فرحانه فيها

و بصداقتها لها وحابة تعرفها على أمها♥

*ماما ماما هاذي صديقتي هبة وتمد إيدها هبة*

و ترفض الأم تسلم عليها و تصد!

*و تبتسم هبة و تقول لهالأم أنا أحب رغد صديقتي -بنتها-*

و بكل إحتقار و قلة أدب تقول الأم لـ بنتها

*إنتي مالقيتي إلا هالعبده ترافجينها !!!!* < آسفه عالكلمة :(

إي قلة أدب هاذي؟

إي حقارة؟

إي عنصرية؟

. . تنقال هالكلمة لـ طفلة, ب مرحلة حرجة جداً؟

و بمرحلة كلها براءة؟

إنتي شنوو!!!!!!!!!

عشان لونها؟ إنتي ماسمعتي كلمتها؟

إنتي ماشفتي إيدها ممده لج ياعسى إيدج الكسر :(((

كل ما اتذكر هالموقف يعورني قلبي :((!

اصلاً شلون تعلمين بنتج العنصرية و التفرقة هاذي؟

إنتي شلون أم؟

من متى بالإسلام في هالشي؟

و إذا لونها غير و إذا؟

في شي أهم من اللون..في شي إسمه إنسانية

في شي إسمه مساواة..في شي إسمه اخلاق

انا ماكاسر خاطري إلا البنت

الله يهدي امها و يكون ب عون بنتها!

:

حاولت أدور فيديو عربي..لكن للأسف ماحصلت

. . هالفيديو شفته من قبل,ورجعت أشوفه وراح ارجع أشوفه

مثل ماهو معروف..إن امريكا يمكن تكون من أكثر الدول الأجنبية عنصرية

ضد المسلمين+ضد اصحاب البشرة السمراء+الأعراق و الأصول

لكن بمثل هالفيديوات أو التجارب قاعدين يحلّون هالمشكلة فيما بينهم

كل مالهم و يطلّعون جيل فاهم و واعي♥

. . شوفوا تعليق الأمريكي اللي يقول "كل إنسان يستحق إن يُعامل بإحترام"

مع إن ولده توّه راجع من حرب العراق!

و مع إنه مو مسلم!

*فعلاً كل إنسان يستحق ب إن يُعامل بإحترام!!*

. . كل إنسان,بغض النظر عن أصله و فصله و دينه ومذهبه!

كلنا من التراب..وراح نرجع للتراب : )

مجتمعج جذي؟ حاولي تصيرين أحسن♥♥

. . ناقشي حاوري بـ "بإحترام" اللي يكون عنصري

ب إي موقف أو حتى رأي

ما يمكن تكسبينه و يقتنع إن تصرفه عنصري؟

و يمكن تقتنعين أكثر ب داخلج إنج صح : )

* كُوني رسالة صلح..لـ نفسج و لـ من حولج

غلط إن نسكت عن الحق..عشان اعتقاد ب داخلج

"إن ممكن اخسر هالإنسان"

"ماودي اضايقه"

"و انا شدخلني بالموضوع؟"

"هو حُر"

. . إذا كل شخص قال لنفسه هالكلام

ماراح نقدر نسوي إي شي لمجتمعنا

و لا حتى نفسنا !!!!

هالإعتقادات تحبط الواحد و تخليه قاعد مكانه!

. . شعور حلو لو خليت شخص يصحح تصرف أو اعتقاد ب داخله

لو خليت شخص يفكر صح

لو وسعت له مدارك التفكير

لو خليته يعتذر لنفسه اولاً+يعتذر للشخص المخطئ ب حقه♥

لو خليته أفضل♥
و خليت نفسك أنت بعد أفضل♥
كافي تثبت لنفسك إنك صح و على حق♥!



*

بالأخير
مجتمع بلا عنصرية..مجتمع أفضل : )♥
إذا حسيتي إن كلامي ممكن يكون غلط
و حابة تناقشيني فيه..شرّفيني بـ تويتر أو الإنستغرام
أو ببوكس التعليقات تحت♥

 

مع السلامممة♥

8 comments talk