تجربة اقامتي بمنتجع العرين | alareen reviwe ♥

السلام عليكم ورحمة الله وبركاته ♥♥

بوست سريع لطيف،،كان مفترض ينزل الاثنين الجاي

لاني محدده ايام الاثنين بس انزل بوستات بس عشانكم :*

لان كثرت الاستفسارات عليه بسناب 

فصقيقاتي السنابيات هالبوست مخصص لكم ولا يهونون صقيقاتي بكل مكان :$

اسرع سفره بالوجود! حجزنا الجمعه بالليل والسبت سافرنا

وكانت من امتع الايام اللي عشتها اللهم لك الحمد♥

على انها مافيها سوق ولا افترينا ولا اي شي!

بس جد الراحة تسوى كل شي♥

 - منتجع وسبا العرين -

منتجع موقعه في مملكة البحرين تحديداً بالعاصمة منطقة زلاق (اذا ماخاب ظني)

خذت اسم المنطقة من فلتر سناب لان مو محصله معلومات دقيقة عن المنتجع

موقع المنتجع بصحرا تقريباً بعيد عن ازعاج السيارات والناس

وبعيد عن المدينة والمجمعات 

يعني اذا رايحه يومين استجمام انصحج فيه♥

يالله ناخذ تفاصيل اكثر؟

نوع حجزنا كان الفيلا الملكية تحتوي على :

سويتين (غرفة رئيسية،صالة،قسم دورة المياة والسونا)

من المدخل على اليمين سويت وله باب من غرفة النوم مطلة على حوض السباحة علطول

نفس الصورة♥

وله باب من الشور دايركت ويطل على السومينق بول وهمن له باب من الصالة

يعني كل سويت ٣ ابواب كل باب يفتح من جهة!

جهة جناحي انا واختي،تفتح غرفتنا على الجاكوزي البارد (ينفع حمام سباحة للاطفال)

بالمقابل جناح الوالد كان يفتح على الجاكوزي الحار♥

عمق السويمنق بول متر و٤٠٠ سم

يعني ينفع لكل الاعمار ماعدا الاطفال..لهم جهة خاصة مثل ماذكرت فوق

اكثر جهة استمتعت فيها طبعاً جهة الجاكوزي!♥♥♥♥♥

ريلاكس عالآخر..على اني جربت اكيد من قبل الجاكوزيات > الجمع ههههههه

بس درجة حرارته مريحة للجسم بشكل..مو مجرد ماي دافي وبس!

الباب اللي ورا الكراسي مثل ما انتوا شايفين

ممكن تفتحونه عالفيلا،،يعني لو كنتوا رايحين عايلة وماكفتكم الغرفتين

ممكن تحجزون فيلا صغيرة وتفتحونها على بعض♥

تفاصيل اكثر عن الفيلا :

قسم دورة المياة\

القسم يحتوي على مغسلتين ومحتوياتهم من استشوار ومناشف وصوابين وغيرهم

مع غرفة سونا والتواليت والبانيو♥

غرفة السونا لها بابين .. داخلي وخارجي

يعني تقدرين تدخلين من برا وتقدرين من داخل الفيلا♥!

غرفة السونا تحتوي على شور وهمن برا في شور 

يعني هوبا من حوض السباحه على الشور الخارجي علطول 

مايحتاج تدخلين p;♥

انصحج تشغلين السونا وتاخذين لج طبة ربع ساعة عقب تاخذين شور خارجي سريع

عشان الكلور وعقب عالسونا علطول♥♥♥♥♥

> ما اشتاقت ابداً!

بعد السونا،ريلاكس عميق♥♥♥

التواليت..كل المكان يشرح الصدر حتى التواليت ههههههه

الصالة♥ ،، تحتوي على تلفزيون وسماعات بكل مكان بالفيلا مثبته بالسقف

يعني اهل الاغاني العراقية والشيلات بيكيفون ههههههه

تحتوي بعد على مكتب وثلاجة صغنونه♥

نروح لبرا السويت شوي

الفيلا فيها بعد ديوانية صغيرة مع تلفزيون 

الاثاث نظيف ماشاء الله وفكرة البلاكات تحت الغنفات♥!

يعني ممكن لو بتحجزين لست اشخاص الى ثمان 

ممكن تكفيكم الفيلا..لان في صالتين وفي ديوانية ممكن ينامون فيها

المطبخ♥

مجهز بالميكرويف + ثلاجة + دورة مياة صغيرة + طاولة طعام 

اللي ماحبيته مافيه فرن او جوله صغيره :\ نبي نسوي قهوة عربية شلون |:

ونسيت آخذ معاي جولة صغيرة للاسف 

فقعدت اصبر نفسي بقهوة الامريكان p;

< محدثتكم عجيز بعمر الزهور ههههههه

مسطحات خضرا او مساحه مدري شالصح :$

دار ما دار الفيلا♥

نجي لخدمات المنتجع بشكل عام

خدمات المنتجع :

- خدمة السبا 

 جربت الريلاكس مساج عندهم على انه غالي بس ماعجبني!

يمكن لان كان فيني تعب متجمع..بس حسيت مساج هيربل احلى منه بواجد

فاذا ماكنتي مضطره تجربينه لا تجربين :$

سكراب زهور اللافندر حلو..كان فري لان خذينا باكج للمساج

بس مو واو مثل ماكنت متوقعه

توقعت بخدمات المنتجع للسبا..تكون ممتازة 

بس كانت مجرد ترتيب واجواء بس كمساج مو حيل عجبني

- المطاعم :

جربت مطعمين بس لان بس وجبتين كنت آكل باليوم

ريوق من المنتجع نفسه وعشا بس♥

اول يوم جربت المطعم الهندي ابداً مااااااعجبني :\

ماحسيت فيه نكهة الاكل الهندي مدري ليش!

٣\١٠ تقيمي له .. الـ٣ حق خبز النان بس

المطعم الثاني كان مطعم رمال \ مطعم ايطالي

جربت باستا وبيتزا .. عجبوني ،حسيت فيهم طعم اكثر من الهندي!

يعتبر جيد بس مو نفس مستوى مطاعمنا

- خدمة الواي فاي :

ممتازة .. بكل مكان في ، داخل وخارج الفيلا وحتى بالمطاعم

الا قسم السبا كلش

يمكن يبونا نرتاح منه شوي p;

- خدمة القولف كار :

ممتازة .. الفيلا شوي بعيده عن المطاعم والرسبشن 

فكل تحركاتنا لكل اقسام المنتجع كانت عن طريقهم

وبظرف خمس دقايق يكونون متواجدين برا الفيلا♥

- خدمة التنظيف :

خدمتهم ممتازة وأمينين وتنظيفهم ممتاز

كذا مرة خلال اليوم كنت اطلب ينظفون الحوض من ريش الحمام 

لان الحمام حيل متواجد ماشاء الله ، كل ما التفت احصل حمامة تطلطل ههههههه

فكان هالشي متعب شويتين ،، على ان حوض السباحة فيه فلتر شغال 

بس لابد من التنظيف السطحي والعميق بعد

خدمة التنظيف ٢٤ ساعة على مدار اليوم

- خدمة مواقف السيارات مجانية

- خدمة ملاعب التنس والنادي الصحي

اقرب الاماكن للمنتجع

* حديقة جنة دلمون الترفيهية المائية

* محمية العرين البرية

* حلبة البحرين الدولية

* متحف دار النفط

* ملعب قولف الرفاع

سعر الليلة بالمنتجع تعتبر غالية نوعاً ما للفيلا الملكية

(مثل حجزنا)

في اقل وفي اصغر من الفيلا♥

و بموقع بوكنق يحطون عروض ساعات وبمواقع ثانيه بعد

حجزنا عن طريق موقع booking

رابط المنتجع ( هنا ) 

لهاللحظة منزلين عرض تاريخ ٢٤ سبتمبر بعد كم يوم بنص سعرنا تقريباً!

فنصيحتي لج اذا ودج تحجزين فيه اربطي ايميلج بالموقع عشان توصلج الخصومات♥

دمتم بحب♥

- ماشاء الله تبارك الرحمن -

دمتم سعيدين ♥

لاي استفسار لا تتردين تسألين ببوكس التعليقات تحت♥♥♥

28 comments reviews