السلام عليكم و رحمه الله وبركاته
شلون الجميلات؟♥
كان المفروض انزل هالبوست من زمااااان . . بس لويه السفر وعمايلها :$
كل عام و انتوا ب الف خير مؤخراً و عسى كل سنة تعودونه لا فاقدين ولا مفقودين يارب♥
هيربل سبا . . من أفضل المراكز اللي ازورهم بين فترة و الثانية
حيل حيل احبه . . مهما كان زحمه و مهما كان حوسة،هدوء وجو موطبيعي♥
زرته قبل العيد بكم يوم، توقعته زحمه و ازعاج و لا راح احصل خدمة نظيفه او اي كلام وبس
بس تفاجأت بالتنظيم مع ان في زباين . . زرت فرعهم الجديد بالمنطقة العاشرة *ابوحليفة*
حبيته♥، بس مادري ليش فرع حولي احبه اكثر♥♥♥
ما الحب الا للحبيبٍ الاولي يمكن هههههههه
اخترت منهم العرض . . (ريلاكس مساج-حمام مغربي-بديكير منيكير مع ماسك-عود الاذن او شي جذي)
بـ ٢٧ دينار♥
غيٌٍرت من العرض . . ماكنت حابه اعواد شمع الاذن،ماجربته بس مدري ليش مو حابته هههههه
الغيت شمع الاذن و زدت عالعرض دينارين و اخترت بداله علاج الشعر بالصبار♥
فصار العرض عندي "مساج+حمام+بديكير منيكير+علاج الصبار"
اول مادفعت قيمة العرض موظفة الكاونتر وصلتني لغرفه الإنتظار
ما انتظرت الا دقيقتين يمكن . . الا اسمع "مس سارا" P;♥
بلشت اول شي بـ علاج الشعر بالصبار، كانت مجهزه لي الصبار مقصص خالص
بدت بتدليك الصبار على منابت الشعر او الفروه
كان بااارد . . ماكان ودي تشيله عني كلش هههههههه♥
طبعاً معروف شكثر الصبار مفيد للشعر
يكثفه . . يغذيه . . يقويه . . يعطي نعومة و لمعة للشعر
و غيرهم♥
بعدها حطتلي حمام زيت لباقي الشعر . . وسوتلي مساج انما ايه :(( » هههههههه
حيل حبيته حسيت بنام هههههه . . عشان تضمن ان مشت على كل فروة الراس
سعره من غير العرض بـ ٦ دنانير
بعدها خذتني لصوب الحمامات المغربية . . له قسم خاص♥
غرفه تبديل للحمام المغربي . . مرايه+ارواب خاصة+دولاب مع مفتاح خاص للزبونه♥
حيل احب حمامهم المغربي . . احس بعدها نظافه نظافه♥
و نفس الموظفه ظلت معاي للآخر♥
سعره من غير العرض بـ ١٠ دنانير
و طبعاً في انواع حمامات ثانيه متوفره ب السبا
منها الحمام الملكي+ الحمام التونسي و غيرهم♥
+ سعر الليفه ب دينار
هم متوفره خدمة السونا ب قسم الحمامات♥
بعدها خذتني لقسم البديكير والمنيكير
"ملاحظين حركه الفوطه؟ ههههههههه متعوب عليها"
ماكان فيه الا انا . . استلمتني نفس الموظفه مع موظفه ثانيه♥
صج ان الموظفه الثانيه بطيئة بس كانت دقيقه بشكل!
حتى لو في اظفر مو مبرود مثل الثاني بشويه فرق بس مايبين حيل تضبطه مثلهم
و ضبطته كذا مرة ليما صار مثله بالضبط هههههه ياحليلها♥
ماكانوا يخلوني اتحرك لو شوي . . كل شي جابوه عندي ههههههه
حتى فوني خذوه من حضني :|
شغلهم نظيف . . و الماسك كان ينعم بشكل♥
حبيت ملمس ايدي بعده ♥.♥
سعره بدون العرض ١٠ دنانير♥
طبعاً في منكم بيسأل وين رأيج عن مساج الريلاكس؟ ههههههه
خليت امي تجربه عني :$ » ابد ماكان ودهاه ههههههه
بس ماكان عندي وقت كافي للمساج للأسف♥
مع اني مجربته من قبل مرتين يمكن
بس خل اقولكم عن تجربة الماما :$♥
اول مادخلت قسم المساج *كان بالدور الثاني*
خذتها الموظفه لغرفه المساج مع روب خاص فيها
و وقت ما امي لبست الروب . . قعدتها على كرسي و حطت رجلها بماي دافي
بعدها سوت لها مساج للقدم♥ . . تقول امي دخت عقبها ههههههههههه
« كلش ماتحمست له :\
تقول من كثر ما المساج يريّح نمت واهيا تسوي ههههههه
« كلش مانامت هي بعد من قبل :$♥
حيل حيل حيل عجيب مساجهم! . . و اجواءهم تريّح البال بشكل
ريلاكس عالآآآآخر :(♥
جربت من قبل مساج اللافندر و كذا سبا . . مافي مثل هيربل♥
حسيتهم صج متعلمين هالشغله و متمرسين فيها
مع انها ساعة بس حسيتها جنها دقيقه :(♥
و في انواع للمساجات طبعاً مثل
مساج الصخور وغيرهم
طبعاً اللي حاسه ان داخلها هوا تقدر تزيد عالعرض ٤ دنانير
و من ضمن المساج كاسات هوا
منها ريلاكس و منها يطلع البرد♥
رحتلهم عالاثنعش ونص الظهر تقريبا وطلعت منهم ٣ العصر♥
ما اتوقع ب اقدر ابدل هالسبا ب اي سبا ثاني♥
فروعهم منتشره بالكويت . . الرقعي-حولي-بوحليفة
و في مراكز رجالية همن♥
- | فكرة :
* اذا عندج رفيجه او اخت محتارة شتختارين لها هدية، هيربل سبا موفرة كرت هديه
(ريلاكس مساج،حمام مغربي،بديكير منيكير مع ماسك،عود شمع الاذن)
و يقدر مسلتم الهدية يغير بالكرت . . يزيد شغله او يبدل شغله♥
مثل ماسويت انا فوق،غيرت شمع الاذن وزدت عليه دينارين عشان علاج الشعر بالصبار♥
و نفس الفكرة للشباب . . اذا عندج اخو خال معرس شي هههههه تنفع له $=
معلومات السبا
هيربل سبا . . مركز للعناية والاهتمام للنساء و الرجال
مواعيد العمل : من ٩ صباحاً الى ٩ مساءاً
افرعهم : حولي-الرقعي-ابوحليفه
Tel: +965 24 888 020
Tel: +965 24 888 040
Tel: +965 24 888 040
وبس جذي خلص البوست :$
بوست سريع حبتين إن شاء الله اكون فدتكم لو شوي وعجبتكم الجولة هههههههه :$
لا تنسين تشتركين بالمدونه عشان يوصلج كل جديد :*♥
و اللي حابه تتابعني ب انستغرام او تويتر . . الاكاونت ع يمين الشاشه♥
كونوا سعيدين♥
أنا بالتأكيد اكتسب المزيد من الصعوبات من كل القليل أكثر من المستغرب منه ، بالمناسبة شكرا للمقال. إذا كنت بحاجة إلى عبايات نسائي ، فاتصل بنا!
ReplyDelete