السلام عليكم ورحمه الله وبركاته ♡
اخيراً قدرت ارجع للمدونه بعد انقطاع ٣ سنوات
مع بوست ان شاء الله يكون مفيد خاصةً للي حاب يزور تركيا قريب
لذلك بإذن الله راح اغطي كل التفاصيل من خلال هالتدوينه
واعذروني راح اقسمها جزئين ♡
جزء للشمال التركي وجزء لبورصه واسطنبول
في هالبوست راح استعرض رحلتي كاملة الى الشمال التركي ان شاء الله
كونها أول مره ازورها ، اما بورصه واسطنبول فتشبعت منها واتوقع واجد منكم عارف كل اماكنها ! ومع ذلك راح اذكر تفاصيلها للي حاب
( الشمال التركي )
مناطق الشمال تتكون من مناطق عديده مثل (طربزون - اوزنغول - حيدر نبي - سلطان مراد - اكابتشي) و واجد مناطق !
طرابزون تعتبر محافظة تضم المناطق اللي ذكرتها مسبقاً
وفي محافظات غيرها قريبه منها
سير رحلتنا كانت كالتالي :
٣ ليالي بورصه
ليله اسطنبول
١٢ ليله بالشمال
ليلتين صبنجه
٣ ليالي اسطنبول
الرحلة كاملةً ٢١ يوم ، وفيها اخطاء كثيرة لكن كنا متقبلينها عادي لان مافي سفره خططنا لها مايطلع خطأ فيها
اول واهم خطأ المفترض طيارتنا كويت - طربزون
ونترك بورصه لنهاية الرحله لكن ماكننا مخططين للشمال ابداً
خلونا نستعرض الرحلة كاملةً
مبدئياً حجزنا الطيران الدولي عالخطوط التركيه من تطبيق المسافر
لاحظت ان مستوى الخطوط التركيه نازل جداً عن السنوات السابقه !
ما ادري ممكن ضغط الصيف ، لكن الاحترافيه بالعمل قالة جداً
عموماً لو تحبون نتكلم عن الاحترافيه بالعمل فأتوقع الطيران المحلي (داخل تركيا) هو الاجدر بالحديث عنه!
بيقاسوس ، من افشل افشل افشل خطوط طيران جربتها بحياتي !
اول مرة اجربها (مطار صبيحه لـ مطار طربزون)
تمت الرحله على خير ، مع ان الطياره كانت غير مؤوهله ابداً للطيران
الكراسي غير مريحه بتة ، المطبات الهوائية بالنسبه لي مميته بوقتها
مع اني ما اخاف من السفر ولا الطيارات بالعكس
لكن وقتها جاني خوف غريب!
اول مره اشوف طيار يحصل غيمة ضخمه ويدخلها بكل عرض وجه هههههه
كنت اراقب الغيوم عن قرب مثل عادتي
غير ان طاقم الطياره غير محترفين بالخدمة
ما اعرف اللي كان يمدحهم شنو شاف فيهم !
رحلة الرجوع الى اسطنبول وقرب رجعتنا للديره
كنا متحمسين جداً ان مابقى الا كم يوم بنتسوق فيها ونرجع على خير
وصلنا مطار طربزون وشفنا كاونتر بيقاسوس مافيه ولا موظف
لكن قلنا ممكن حنا بكرنا بالجية و راح يفتحون الكاونتر قبل الرحله بساعة ونصف!
شفنا ان طولوا زيادة ، رحنا للمكتب الخاص للطيران وبلغونا ان الرحله تكنسلت!
تكنسلت ؟؟ طيب وحجزنا؟؟ وفلوسنا؟؟ طيب وحجز الفيلا والفندق اللي اندفعت مقدماً؟
الموظفه ببساطة بعد ماكلمناها وصار شد مع بعض العوائل اللي بنفس الرحلة
طلعت من المكتب وقالت ببساطه تفاهموا مع الرقم الساخن المعروض (=
والرقم ولا يرد على اي اتصال اساساً
اضطرينا نحجز على الطيران التركي وحصلنا رحلة بعد رحلتنا بساعة
تواصلنا مع تطبيق المسافر ماجانا اي رد الا تعويضنا بمبلغ بسيط جداً لدرجة ما يستاهل اقوله مع عدم ذكر اي سبب لألغاء الرحلة !
عموماً كان درس لي صراحه ، عشان اختار احجز بطيران محترم♡
حتى لو كان محلي ورحلة قصيرة
نجي الحين نستعرض الفنادق اللي حجزتها بطربزون
مبدئياً قبل كل شي واجد انسألت ليش حجزتوا بطزبزون ؟
طرابزون تعتبر هي السنتر لكل المناطق اللي مريناها
وعشان فيها الخدمات اللي ممكن تحتاجها اي عايله لاسمح الله
مثل مستشفى قريب - سوبرماركات كبيرة - مجمعات واكثر
غير انها ونيسه بالتمشي ، طبيعه وبحر ♡
الفندق الأول
سيرا ليك ( sera lake )
الموقع : على مطل سيرا
الفندق كان جميل جداً من اطلاله و روم سيرفس وخدمة سبا ومساج
لكن واجهتنا مشكله وحيده بهالفندق
كوننا عايله والحجز لـ ٤ غرف تمت في نفس اللحظة يعني الحجز كان واحد
لكن للاسف اول ما وصلنا لهم وزعوا الغرف بالمباني كلهم !
الفندق يتكون من ٤ مباني فصار حجزنا كل غرفه بمبنى وهالشي ابداً مو مقبول عند ابوي ولا حتى عند اي مسؤول أسرة أن عياله مايكونون قريبين منه
او على الاقل يكونون العيال يم بعض !
صار شد من الوالد لحد ماحصلنا ٣ غرف بمبنى و غرفه بمبنى جنبه بالضبط
لذلك أحرصكم اذا انتوا عايله حابين تحجزون فيه بلغوهم عند الحجز من بوكنق او اي موقع ثاني .. أن حجزكم يكون جنب بعض او حتى بنفس المبنى
والافضل تتصلون فيهم .. هاتفياً ممكن يستجيبون أكثر وتتأكدون من نفسكم أكثر
راح استعرض بعض من تصويري للفندق واعذروني على ردائه الجودة لأني ابداً ماكنت مخططه
مدة الاقامة فيه كانت ٣ ليالي ( الفندق غالي شوي بس يسوى )
الريوق او الفطور حلو ، الاطلاله رائعه
بالنسبه لي راح ارجع اكرر تجربة الاقامة فيه اكيد♡
فندق مافيلي ( Maveli )
الموقع : قريب من مطار طرابزون
انتقلنا له لان الفندق الاول وصل لألفين دينار اذا مددنا فيه
غير ان حرام نمدد ونحط هالمبلغ واحنا نبي نتمشى ولا نرجع الا متأخر
من الآخر ماراح نحلله P;
الفندق يعتبر أوتيل يعني مافيه خدمة سبا ولا روم سيرفس
ويعتبر سعره مو بسيط واتوقع من الاغلاط اللي حطنا فيها
مثلاً الغرفه عنده بـ ٣٥ دينار الليله
اذا سويت بـ ٧٠ دينار الليله
مبدئياً اسعاره مو بسيطه اذا مدة طويلة او لعايله
لو لزوجين يعتبر ممتاز
متوفر خدمة الفطور طبعاً والادارة احرجونا بطيبهم جداً جداً
تحديداً موظف بأسم (أسامه) سوري الجنسية
خدوم ومتعاون ولا قصر معانا
الاداره كلها صراحة ، بشوشين وخدومين
والحلو فيه انه هادي يعني مو زحمه ولا ازعاج مقيمين ابداً
ويعتبر صغير مثلا الدور فيه ٤ غرف ماكسيموم
اعذروني ما صورت فيه ابداً لذلك راح ارفق صور موقع بوكنق
كوخ اكاباتشي
حجزنا فيه ليلة قبل ما نروح لأسطنبول
لو اقولكم انها كانت ليلة ممتعة الى ابعد حد ! ♡
غير ان سعره كان بلاش مقارنة بأي فندق سواءاً جربته او لا
كانت الليلة بـ ٤٠ دينار مايقارب ٨٠٠ ليرة
(انصحكم تحجزونه من الرقم اللي راح ارفقه لكم ان شاء الله)
لان السعر بيكون أعلى بأي موقع ثاني
الكوخ كان يكفي لـ ٦ اشخاص لكن من خلال اقامتي فيه ما يكفي الا ٤ اشخاص وطفل
الا لو يقيمون بالصاله P:
الكوخ مكون من دورين وله اطلالات مختلفه في اكواخ مطله على البحر والجبل الاخضر وفيه اكواخ مطله على الجبال فقط
حرصوا وقت الحجز تختارون الكوخ اللي تحبون اطلالته اكثر
في مطعم قريب منه يفصل بينه وبين الاكواخ درج عالي شوي
الفطور فيه مجاني اذا كنتوا من المقيمين
هذا الفطور ، من كل مالذ وطاب ♡
تجربة الاقامة كانت ممتازه جداً ، اطلاله ، لمة أهل ، خدمة ، مطعم والعاب قريبه عالاكواخ
وسعر ممتاز
هذا الرقم اللي تتواصلون عليه منه
واقامه سعيده يارب ♡
\
بالنسبه للواي فاي اللي صارت ضجه عليه بسناب مابين مؤيد ومعارض
حجزت جهازين للواي فاي من موقع رينت كونكت
بالضبط من تاريخ ٦ يوليو الى ٢٧ يوليو
للأمانة تجربة سيئه جداً معاه في الشمال والبورصه
اللهم اسطنبول بس صار قوي ! عشان اكون حقانيه
في الشمال ومناطق بورصه كان سيء ، يقطع وبطيء وواجد اوقات يفصل بالمرة
مع انهم ذاكرين لجميع المناطق حتى الريفيه منها
المشكله مو بس المناطق الريفيه حتى المدينه ماكان يشتغل عدل
دفعت مايقارب ٨٠ دينار للجهازين ، بهالمبلغ آخذ ٦ شرايح انترنت لامحدود
ولا راح يفصل كثره
بغششكم بشغله
من محاولاتي بالراوتر فصلت الشريحه عن الجهاز عشان يشتغل
وشفت ان الشريحه (فيدافون) @@ معناته ممكن تشترون شريحه من فيدافون بأنترنت لامحدود وتحطونها بجهازكم أو بجهاز واي فاي من هواوي
وراح يشتغل معاكم بأقل من المبلغ اللي دفعته اكيد
حيله ممكن اجربها مستقبلاً للأمانه ؛>
رحلة الشمال كانت ممتعة جداً ، المناطق كانت تاخذ العقل راح اذكرها لكم على السريع وانتوا بحثوا عنها اكثر لكن أنصحكم تسجلونها ولازم تزورونها
لاني راح اذكر المناطق التوب عندي ♡
١. حيدر نبي
٢. سلطان مراد
٣. اورنغول
٤. همس كوي
٥. آيدر
٦. ريزا
٧. اوردو
اكثر منطقه خذت قلبي هي السلطان مراد
بنات تحسونكم تمشون بين الغيوم فعلاً !
فيها خيام للتأجير واذا ماخاب ظني في كويتي يأجر بيت شعر بعد
افضل مكان بالعالم بالنسبه لي تقضون فيه نهار كامل
فيه سنتر قريب فيه فندق مع مطاعم واكشاك والعاب قريبه من مسدسات وبالونات واكثر♡
وطبعا البقر يمشون حولكم ، كانت خيال خيال !
اي اللي ورا غيم .. الله يرزقنا الجنة بس ♡
تقريباً خلصنا اهم الاشياء بالشمال من خلال تجربتي
راح ارفق لكم جدول سياحي فيه الامكان بالضبط مع اللوكيشن
ممكن تستفيدون منه اكثر
رابط الجدول (هنا) ♡
رحلة سعيدة يارب وأي سؤال ياليت يكون ببوكس التعليق تحت عشان اجاوب عليه للكل
شكراً على القراءه
وانتظروني بالجزء الثاني ♡
في هالبوست راح استعرض رحلتي كاملة الى الشمال التركي ان شاء الله
كونها أول مره ازورها ، اما بورصه واسطنبول فتشبعت منها واتوقع واجد منكم عارف كل اماكنها ! ومع ذلك راح اذكر تفاصيلها للي حاب
( الشمال التركي )
مناطق الشمال تتكون من مناطق عديده مثل (طربزون - اوزنغول - حيدر نبي - سلطان مراد - اكابتشي) و واجد مناطق !
طرابزون تعتبر محافظة تضم المناطق اللي ذكرتها مسبقاً
وفي محافظات غيرها قريبه منها
سير رحلتنا كانت كالتالي :
٣ ليالي بورصه
ليله اسطنبول
١٢ ليله بالشمال
ليلتين صبنجه
٣ ليالي اسطنبول
الرحلة كاملةً ٢١ يوم ، وفيها اخطاء كثيرة لكن كنا متقبلينها عادي لان مافي سفره خططنا لها مايطلع خطأ فيها
اول واهم خطأ المفترض طيارتنا كويت - طربزون
ونترك بورصه لنهاية الرحله لكن ماكننا مخططين للشمال ابداً
خلونا نستعرض الرحلة كاملةً
مبدئياً حجزنا الطيران الدولي عالخطوط التركيه من تطبيق المسافر
لاحظت ان مستوى الخطوط التركيه نازل جداً عن السنوات السابقه !
ما ادري ممكن ضغط الصيف ، لكن الاحترافيه بالعمل قالة جداً
عموماً لو تحبون نتكلم عن الاحترافيه بالعمل فأتوقع الطيران المحلي (داخل تركيا) هو الاجدر بالحديث عنه!
بيقاسوس ، من افشل افشل افشل خطوط طيران جربتها بحياتي !
اول مرة اجربها (مطار صبيحه لـ مطار طربزون)
تمت الرحله على خير ، مع ان الطياره كانت غير مؤوهله ابداً للطيران
الكراسي غير مريحه بتة ، المطبات الهوائية بالنسبه لي مميته بوقتها
مع اني ما اخاف من السفر ولا الطيارات بالعكس
لكن وقتها جاني خوف غريب!
اول مره اشوف طيار يحصل غيمة ضخمه ويدخلها بكل عرض وجه هههههه
كنت اراقب الغيوم عن قرب مثل عادتي
غير ان طاقم الطياره غير محترفين بالخدمة
ما اعرف اللي كان يمدحهم شنو شاف فيهم !
رحلة الرجوع الى اسطنبول وقرب رجعتنا للديره
كنا متحمسين جداً ان مابقى الا كم يوم بنتسوق فيها ونرجع على خير
وصلنا مطار طربزون وشفنا كاونتر بيقاسوس مافيه ولا موظف
لكن قلنا ممكن حنا بكرنا بالجية و راح يفتحون الكاونتر قبل الرحله بساعة ونصف!
شفنا ان طولوا زيادة ، رحنا للمكتب الخاص للطيران وبلغونا ان الرحله تكنسلت!
تكنسلت ؟؟ طيب وحجزنا؟؟ وفلوسنا؟؟ طيب وحجز الفيلا والفندق اللي اندفعت مقدماً؟
الموظفه ببساطة بعد ماكلمناها وصار شد مع بعض العوائل اللي بنفس الرحلة
طلعت من المكتب وقالت ببساطه تفاهموا مع الرقم الساخن المعروض (=
والرقم ولا يرد على اي اتصال اساساً
اضطرينا نحجز على الطيران التركي وحصلنا رحلة بعد رحلتنا بساعة
تواصلنا مع تطبيق المسافر ماجانا اي رد الا تعويضنا بمبلغ بسيط جداً لدرجة ما يستاهل اقوله مع عدم ذكر اي سبب لألغاء الرحلة !
عموماً كان درس لي صراحه ، عشان اختار احجز بطيران محترم♡
حتى لو كان محلي ورحلة قصيرة
نجي الحين نستعرض الفنادق اللي حجزتها بطربزون
مبدئياً قبل كل شي واجد انسألت ليش حجزتوا بطزبزون ؟
طرابزون تعتبر هي السنتر لكل المناطق اللي مريناها
وعشان فيها الخدمات اللي ممكن تحتاجها اي عايله لاسمح الله
مثل مستشفى قريب - سوبرماركات كبيرة - مجمعات واكثر
غير انها ونيسه بالتمشي ، طبيعه وبحر ♡
الفندق الأول
سيرا ليك ( sera lake )
الموقع : على مطل سيرا
الفندق كان جميل جداً من اطلاله و روم سيرفس وخدمة سبا ومساج
لكن واجهتنا مشكله وحيده بهالفندق
كوننا عايله والحجز لـ ٤ غرف تمت في نفس اللحظة يعني الحجز كان واحد
لكن للاسف اول ما وصلنا لهم وزعوا الغرف بالمباني كلهم !
الفندق يتكون من ٤ مباني فصار حجزنا كل غرفه بمبنى وهالشي ابداً مو مقبول عند ابوي ولا حتى عند اي مسؤول أسرة أن عياله مايكونون قريبين منه
او على الاقل يكونون العيال يم بعض !
صار شد من الوالد لحد ماحصلنا ٣ غرف بمبنى و غرفه بمبنى جنبه بالضبط
لذلك أحرصكم اذا انتوا عايله حابين تحجزون فيه بلغوهم عند الحجز من بوكنق او اي موقع ثاني .. أن حجزكم يكون جنب بعض او حتى بنفس المبنى
والافضل تتصلون فيهم .. هاتفياً ممكن يستجيبون أكثر وتتأكدون من نفسكم أكثر
راح استعرض بعض من تصويري للفندق واعذروني على ردائه الجودة لأني ابداً ماكنت مخططه
مدة الاقامة فيه كانت ٣ ليالي ( الفندق غالي شوي بس يسوى )
الريوق او الفطور حلو ، الاطلاله رائعه
بالنسبه لي راح ارجع اكرر تجربة الاقامة فيه اكيد♡
فندق مافيلي ( Maveli )
الموقع : قريب من مطار طرابزون
انتقلنا له لان الفندق الاول وصل لألفين دينار اذا مددنا فيه
غير ان حرام نمدد ونحط هالمبلغ واحنا نبي نتمشى ولا نرجع الا متأخر
من الآخر ماراح نحلله P;
الفندق يعتبر أوتيل يعني مافيه خدمة سبا ولا روم سيرفس
ويعتبر سعره مو بسيط واتوقع من الاغلاط اللي حطنا فيها
مثلاً الغرفه عنده بـ ٣٥ دينار الليله
اذا سويت بـ ٧٠ دينار الليله
مبدئياً اسعاره مو بسيطه اذا مدة طويلة او لعايله
لو لزوجين يعتبر ممتاز
متوفر خدمة الفطور طبعاً والادارة احرجونا بطيبهم جداً جداً
تحديداً موظف بأسم (أسامه) سوري الجنسية
خدوم ومتعاون ولا قصر معانا
الاداره كلها صراحة ، بشوشين وخدومين
والحلو فيه انه هادي يعني مو زحمه ولا ازعاج مقيمين ابداً
ويعتبر صغير مثلا الدور فيه ٤ غرف ماكسيموم
اعذروني ما صورت فيه ابداً لذلك راح ارفق صور موقع بوكنق
كوخ اكاباتشي
حجزنا فيه ليلة قبل ما نروح لأسطنبول
لو اقولكم انها كانت ليلة ممتعة الى ابعد حد ! ♡
غير ان سعره كان بلاش مقارنة بأي فندق سواءاً جربته او لا
كانت الليلة بـ ٤٠ دينار مايقارب ٨٠٠ ليرة
(انصحكم تحجزونه من الرقم اللي راح ارفقه لكم ان شاء الله)
لان السعر بيكون أعلى بأي موقع ثاني
الكوخ كان يكفي لـ ٦ اشخاص لكن من خلال اقامتي فيه ما يكفي الا ٤ اشخاص وطفل
الا لو يقيمون بالصاله P:
الكوخ مكون من دورين وله اطلالات مختلفه في اكواخ مطله على البحر والجبل الاخضر وفيه اكواخ مطله على الجبال فقط
حرصوا وقت الحجز تختارون الكوخ اللي تحبون اطلالته اكثر
في مطعم قريب منه يفصل بينه وبين الاكواخ درج عالي شوي
الفطور فيه مجاني اذا كنتوا من المقيمين
هذا الفطور ، من كل مالذ وطاب ♡
تجربة الاقامة كانت ممتازه جداً ، اطلاله ، لمة أهل ، خدمة ، مطعم والعاب قريبه عالاكواخ
وسعر ممتاز
هذا الرقم اللي تتواصلون عليه منه
واقامه سعيده يارب ♡
\
بالنسبه للواي فاي اللي صارت ضجه عليه بسناب مابين مؤيد ومعارض
حجزت جهازين للواي فاي من موقع رينت كونكت
بالضبط من تاريخ ٦ يوليو الى ٢٧ يوليو
للأمانة تجربة سيئه جداً معاه في الشمال والبورصه
اللهم اسطنبول بس صار قوي ! عشان اكون حقانيه
في الشمال ومناطق بورصه كان سيء ، يقطع وبطيء وواجد اوقات يفصل بالمرة
مع انهم ذاكرين لجميع المناطق حتى الريفيه منها
المشكله مو بس المناطق الريفيه حتى المدينه ماكان يشتغل عدل
دفعت مايقارب ٨٠ دينار للجهازين ، بهالمبلغ آخذ ٦ شرايح انترنت لامحدود
ولا راح يفصل كثره
بغششكم بشغله
من محاولاتي بالراوتر فصلت الشريحه عن الجهاز عشان يشتغل
وشفت ان الشريحه (فيدافون) @@ معناته ممكن تشترون شريحه من فيدافون بأنترنت لامحدود وتحطونها بجهازكم أو بجهاز واي فاي من هواوي
وراح يشتغل معاكم بأقل من المبلغ اللي دفعته اكيد
حيله ممكن اجربها مستقبلاً للأمانه ؛>
رحلة الشمال كانت ممتعة جداً ، المناطق كانت تاخذ العقل راح اذكرها لكم على السريع وانتوا بحثوا عنها اكثر لكن أنصحكم تسجلونها ولازم تزورونها
لاني راح اذكر المناطق التوب عندي ♡
١. حيدر نبي
٢. سلطان مراد
٣. اورنغول
٤. همس كوي
٥. آيدر
٦. ريزا
٧. اوردو
اكثر منطقه خذت قلبي هي السلطان مراد
بنات تحسونكم تمشون بين الغيوم فعلاً !
فيها خيام للتأجير واذا ماخاب ظني في كويتي يأجر بيت شعر بعد
افضل مكان بالعالم بالنسبه لي تقضون فيه نهار كامل
فيه سنتر قريب فيه فندق مع مطاعم واكشاك والعاب قريبه من مسدسات وبالونات واكثر♡
وطبعا البقر يمشون حولكم ، كانت خيال خيال !
اي اللي ورا غيم .. الله يرزقنا الجنة بس ♡
تقريباً خلصنا اهم الاشياء بالشمال من خلال تجربتي
راح ارفق لكم جدول سياحي فيه الامكان بالضبط مع اللوكيشن
ممكن تستفيدون منه اكثر
رابط الجدول (هنا) ♡
رحلة سعيدة يارب وأي سؤال ياليت يكون ببوكس التعليق تحت عشان اجاوب عليه للكل
شكراً على القراءه
وانتظروني بالجزء الثاني ♡
0 comments:
Post a Comment