نحن محاربين لسنا مرضى♥ *شويه سواليف♥*

السلام عليكم و رحمه الله و بركاته

يمكن العنوان يوحي بمحتوى البوست حبتين ههههههه

للأسف ماشفت اي بلوقر او يوتيوبر تكلمت عن هالموضوع من قبل

و شكثر هو مهم و يفيد حيل فوق مانتصور!!! ♥♥♥♥

الا ممكن يقلب الحال ٣٦٠ درجه♥

من الاسباب اللي خلتني اكتب هالنوع من البوستات

تعليق من شخص على صوره مريض بالسرطان و اسمحولي استبدل كلمه "مريض" بـ محارب

لانه فعلاً محارب للسرطان و ليس مريض به♥!

عموماَ احدى الاكاونتات المعروفه ب انستغرام كانوا حاطين صوره شخص مع دعاء له بالشفاء

و الطبيعي تكون التعليقات "دعاء-تحفيز او اي كلام ايجابي ممكن يهون عليه"

بس الغير طبيعي ان كان تعليقين انتبهت لهم محبطه بشكل!!

شخص كان كاتب "مستحيل تقدر عليه السرطان من اقوى الامراض"

و شخص آخر " وجهك مو وجه شخص بيقدر على هالمرض"

هذا مايؤكد ان فعلا المرض مو مرض الجسد . . الا مرض النفوس و الله يعينهم عليه!

حاولت افكر شاللي يخلي هالناس تتكلم بهالطريقه 

او شاللي يجبرهم ان يحبطون اللي حولهم حتى لو كانوا هم محبطين!

يعني اشوف ان ممكن احبطك ب وظيفه معينه . . او ب شي انا ما اشوفه مناسب لك

او ب اي اسباب ثانيه، بس اتكلم بهالطريقه و انا اعرف تماماً ان هالشخص حتى لو كنت ما اعرفه

محتاج كلمه حلوه . . محتاج دعاء، محتاج يعرف ان هالشي مو صعب عليه و قادر عليه بإذن الله♥

شنو يعني مرض . . شنو يعني سرطان؟

شنو يعني ألم ، شنو يعني كل هذا؟

كل هالاشياء انت قادر عليه . . قادر تنهيه ب ايدك

قادر تتغلب و تنتصر بالنهاية ، قادر تشفى منه

قادر قادر قادر♥♥♥♥♥

حتى انتي قادرة . . كلنا قادرين ان شاء الله♥♥♥♥♥

كلنا قادرين نتغلب على اي مصاعب بحياتنا،كافي نحس بهالاحساس و نكمل فيه إلى النهاية

كافي نصدق نفسنا و نأكد لها قبل ما نأكد لأي احد اننا اقوياء و ان هالشي الصغير ماينهينا!♥

الحياه لسى حلوه . . و تبيك تكمل فيها بأهدافك،بطموحاتك،بأحلامك♥!

و قبل هذا كله الرضا باللي يكتبه الله لنا . . "المرض رسالة من الله لعبده" و "المرض ابتلاء"

فـ الله اذا احب عبدٍ ابتلاه♥ ، يكفي نحس بهالايمان بداخلنا و ان ربنا ويانا و حاس فيننا و يكتب لنا الاجر بكل لحظة ألم♥

تذكرت قصه لبنت بالعشرين . . كانت مسافره الى منطقه اهل امها 

قريه اعتقد قريب من الرياض،قدر الله و صارلهم حادث الله يرحمهم جميعاَ :(

توفوا اهلها كلهم . . ماعدا اهيا سبحان الله و اخوها الصغير كان عمره سنتين

سوت فحوصات عقب الحادث عشان يتأكدون ان كل شي سليم . . لكن اللي ماكانت متوقعته

انها كانت مصابه بالسرطان، سرطان الثدي . . كان المرض في بدايته بس حالتها النفسية السيئة وقتها

و اهمالها للعلاج خلت المرض بآخر مراحله، نست اخوها اللي محتاجها . . قعدت تفكر انها خلاص بتموت

و ان هالمرض صعب عليها و لا هي قادره عليه و افكار واجد تكتم من كثر ماهي سلبية!

بيوم من الايام و اثناء العلاج الكيماوي . . قررت انها خلاص ترجع تقاوم ، تذكرت ان في طفل محتاجها

و ان لازم تعيش عشانه و عشان تحميه و يكبر معاها . . تذكرت ان رحمه الله واسعه و ان هو معاها و بيقويها على هالمرض، ضلت فتره تقاوم و تقاوم . . ما اهملت العلاج ابداَ، صارت تدور على اي شي ايجابي يقويها

لحد ماتمكنت منه نهائياَ♥♥♥♥♥♥♥ انتصرت عليه و عاشت عشان اخوها. . لان لها هدف و عزيمة و اصرار حتى بعز ازمتها، و غير هذا كله ان كان عندها ايمان بالله، و انه بإذنه راح يشافيها و تقوم من فراش هالمرض لأخوها

مع انها كانت تتضايق من نظرات عماتها لها . . نظرات شفقه، و تعليقات محبطه

بس ايمانها بالله كان فوق كل شي . . و اقوى من كل شي♥

. . . و الحين : معلمة وزوجة ناجحة و أم لـ بنتين و ٣ اولاد♥

قصة شفاء ( هنا ) . . فعلاَ كانت قصة كفاح

ضروري تقرونها♥♥♥

بجانب آخر . . كثير من الحالات كان من الممكن علاجها و انتصارها على هالمرض

لكن الافكار السلبية و الحالة النفسية السيئة جداَ اللي ممكن تصعب اي مرض بالدنيا

حتى الانفلونزا او ألم البطن او اي ألم عادي

و هالشي جربته بنفسي . . لو تحوشني حرارة او ألم بسيط 

الطبيعي ان يتعكر مودي و مالي خلق اشوف احد و متضايقه و قاعده بالفراش ٢٤ ساعة

بس لو اغير جوي بيخف الالم عني . . فصايره كل ما اتعب اطلع او اسوي شغله احبها و احاول كثر ما اقدر اغير مودي♥

حتى الاكزيما اللي اعاني منها حالياً . . لو يتعكر مزاجي اتضايق حيل و تحكني بشكل و ما انام الا بمسكن

بس من يصير مزاجي اوكي و لا جنه فيني شي . . و هالشي مايدل الا ان المود اهم من كل شي♥

و الحاله النفسيه تغير الواحد من إلى

في حملة ممتازه على صفحة بالفيس بوك للأخ : حمزه اسكندر

تشافى من المرض بحمد الله ، حملته عجيبه حيل . . قدر يقوي المئات من المصابين

حملته ايجابيه بشكل ، و الدعم اللي صار كان من اول اسباب شفاءه بعد الله طبعاَ

اهني مقابلته مع العربيه . . و شرح تفاصيل حملته

صفحة الحملة على الفيس بوك ( هنا )

و مثل ماكان مكتوب على تي شيرته :

السرطان مايقدر

يبعدني عن ربي♥

ياخذ ابتسامتي♥

يبعدني عن اصحابي♥

يحطم آمالي♥

عيشوا حياتكم باللي تطمحون له . . عيشوها بأحلامكم و آمالكم

و تأكدوا مافي شي بعيد، كل شي نقدر نحققه بس بشويه اصرار و ايمان بإن كل اللي نبيه بيتحقق♥

اللهم إشف مرضانا و مرضى المسلمين شفاءَ لا يغادره سقما

اتمنى بإن البوست يوصل لكل الناس . . يمكن بهالكلام البسيط نقدر نغير شي♥

و اذا عندج قصة بهالجانب لا تترددين تواصليني فيها عالايميل♥

او اي استفسار ، لاتترددين كلش ياجميلة♥

و اللي حابه تتابعني ب انستغرام او تويتر . . الاكاونت ع يمين الشاشه♥

كونوا سعيدين♥

2 comments talk