السلام عليكم و رحمة الله وبركاته . . هالبوست تحديداً اتوقع بيكون الاقرب لقلبي وقلبكم اكثر من اي بوست ثاني :$♥
" شمعنى التدوين؟" . . هالسؤال سألته لنفسي مليون مرة قبل ما افتح لي بلوق ، ليش تكونين بلوقر؟ شنو بتقدمين؟
شنو بتفيدين؟ . . كنت متخوفه بشكل! ان ماراح اعرف افيد احد ، او يكون وجودي وعدمي واحد!
طبعاً هالاحساس ظل معاي فترة مو قصيرة ابد . . يمكن ليومكم هذا p;
كان ودي اتكلم عن هالشي من قبل ، بس قلت لما تصيرلي مدة كافية من بطلت المدونه
و هذا انا . . صارلي سنة ونص تقريباً♥
اتعب و اقول شكثر فادني هالشي ! . . انت شخص تدوّن؟ اياً كانت نوع تدويانتك
اذن انت شخص غير اعتيادي . . مختلف عن كل شي!
بالبداية خذيت رأي امي . . مامانعت كلش يخليها لي♥ ، بس سألتني انتي حابة هالشي؟ مو فترة وخلاص تنسين؟
كنت جذي . . اهبّ بشغله و خلاص انساها و زين مني اتذكرها همن ههههههه
و يمكن اغلبنا، اياً كانت هالشغله حتى لو كريم او منتج p:
فكرت بهالشي طبعاً بس حاول ابعده عني كثر ما اقدر . . اذا كنت حاب شي لا تخلي اي فكرة سلبية تسيطر عليك و تفقدك لذته♥
بعضكم مستغربين يمكن ، شبيفيدج البلوق شيضيفج؟ معقولة تقعدين تكتبين و بس تنطرين كومينت او رأي اي بنت بالبوست؟
بالعكس ياما بوستات كتبتها من قبل و لا كان فيه اي رد او كومينت عليه و ما وقفت ابداً♥
دامك تسوي شي حابة و تحسه قريب من قلبك خلاص♥
حبيت اكون شخص غير عادي افيد بتجاربي البسيطة اي شخص يقراً البوست او الريفيوات تعطيه فكرة عن هالمنتج
قبل ماتجربه . . او تجربة زيارة مطعم او شويه سواليف ايجابية افيد فيها غيري حتى لو ماتكلم و قال شكثر البلوق يفيده♥
يكفي . . احصل دعوة حلوة بظهر الغيب ، بكلام شجعها او منتج استفادت منه او اي شي ثاني♥!!!
اكثر سؤال ينسأل لي
"بالله لج خلق تكتبين كل هذا لا وماتحصلين تفاعل و متابعاتج قليل مقارنة بغيرج؟"
انا انسانة اؤمن بإن النجاح مايجي بسرعة مهما كان نوع هالنجاح
و اللي ينجح بسرعة هائلة بكم شهر . . ما اعتبره نجاح! مو سالفة غيرة ابد لا او حسد
بالعكس الله يهني الجميع بتعبه :$ ،، بس النجاح بالنسبة لي حبة حبة . . مرحلة بمرحلة بمرحلة
و بهالشي لذة ماحصلتش! . . دامك تؤمن بنفسك انك "ناجح" مهما مرت عليك مواقف حبطتك او تعليقات ضايقتك
كافي هالإيمان اللي بداخلك . . هالإيمان بحد ذاته اقوى دافع ممكن يحرك الانسان لهدفه و طموحاته و احلامه اللي وده يحققها بحياته♥!!
و يكفي اشوف بمتابعاتي جمال مو موجود عند اي احد ثاني♥ *تصفيق يالله هههههههه*
متابعاتي قليل مقارنة بغيري لأني ما احب اسوي "تبادل" او "اعلانات" بشكل مستمر
احس هالشي يفقد جمال البلوق . . حلو ان الواحد ينتشر و ينشهر بس ما احب اللي يعرفون مدونتي
يعرفونها لمجرد ان شافوا اعلاني عند اي احد . . ابي يعرفونها و يحبونها عالمواضيع او البوستات اللي تنطرح، مو لشهرة لمجرد الشهرة!
غير جذي الاعلانات الكثيره تضايق الناس . . و انا وحدة منهم!
اي حساب ضايفته ب انستا يسوي اعلانات بشكل مستمر + يغث ، اقرب انفولو و اريح راسي!
الاعلانات و التبادلات كانت مخصصه ليوم الجمعة بس . . بس بهالشكل اليومي مستفز بشكل
ياما حسابات جميلة بس هالشي مخرب عليها و قاتل جمالها!
غير اللي ياخذون مبلغ من ورا هالاعلانات ، اكره هالشغله بشكل :|
طيب ما حلو يتم الاعلان عن شي مجرب . . مو لاعلان لمجرد الاعلان ماله اي فايدة و لا مكتوب اي تجربة صادقة بسلبياتها و ايجابياتها!
نرجع لموضوعنا p;
البلوق غيرني للأفضل بشكل . . قبل كنت اشتري منتجات اجربها يوم يومين و امل منها و احذفها بالدرج و خلصنا
مع ان هالشي غلط بس كنت اعاند و اقول اي خرطي شكله مابين معاي شي بأول يومين خلاص! هههههههه
مع ان هالمعلومة غلط حيل! كل شي مايبين من اول شي لازم فترة معينه عشان نقدر نحكم عليه عدل
الحين غير . . صرت اشتري منتجات اجرب حيل و لفترة كافية عشان اقدر احكم عليها + اكتب عنها♥
ماتتصورون شكثر هالشي ممتع ان اكتب تجربتي عن شغله مجربتها ♥.♥
احس بإنجاز وقتها♥ و ان هالشي بيفيد بنات و يمكن اقدر احمسهم على المنتج الفلاني و اخليهم يهونون عن الثاني هههههه . . حلو ان تجرب شغله لنفسك و بنفس الوقت تحب تفيد غيرك فيه!♥
زاد اهتمامي لنفسي و لمن حولي . . صرت دقيقه اكثر مهتمة اكثر، زادت اهتماماتي صرت متطلعه عالحياة اكثر
زاد ايماني بنفسي . . زادت ثقافتي اكثر، كبرت و كبرت افكاري وتنوعت♥
لما اشوف اول بوستاتي علطول يطري فبالي "انا شكنت احس فيه وقتها؟" هههههههه
كنت فصله بشكل :| و هبله :| لا لوسمحتوا لحد يشوف بوست قديم لي هههههههه
البدايات دايماً صعبه و شكله مخي كان متأثر شويتين p;
احب احد يسألني "ساره شرايج بهالمنتج؟" . . "سارة الشغله الفلانيه شلونها فادتج يسوى اشتريها؟"
شكثر هالشي يسعد ان احد يسألج و تقدرين تفيدينه♥!
حيل استانس لما رفيجتي او وحدة من متابعاتي تكلمني دايركت و تقولي انها جربت هالمنتج و تنصحني اجربه و اكتب عنه بالبلوق ♥♥♥♥♥
"شنو بعد البلوق؟"
مافكرت شنو بعد البلوق . . لان احس ان مابعده شي و لا قبله شي!
احبه يستمر معاي طول عمري ، احب يعيش معاي اي مرحلة من مراحل حياتي
احب اسولف مع متابعاتي بكل موضوع يهمنا . . و نظل نسولف مهما مرت فترة طويلة!
احب يكون مرجع لي و لكل شخص يحب يستفيد♥!
احب تدويناتي تظل معاي و تكون جزء لا يتجزء من ساره
احب تجي فترة ادون كل طموحاتي و شنو حابة اوصل له و ان "قدرت اوصل لهالشي♥"
شخصيتي حالمة شويتين . . بس دامني ماشيه صح، اعرف شنو ابي بالضبط..و دام ان هالشي خير لي ليش مايصير؟♥
جاني سؤال غريب بالاسك
"ساره شفتج بالكلية ماكأنج بلوقر ابد :|"
هههههههه مارديت هناك ماراح اعرف ارد بإسترسال يعني p;
البلوقر انسانه عاديه حالها حال اي وحده ثانيه . . في اللي تهتم بنفسها بطلعتها فاللي يشوفها يقول صح هذي البلوقر!
ما اقول ما اهتم انا بالعكس ، بس بطلعاتي خصوصاً ما احب اهتم بنفسي زيادة عن اللزوم!
انسانه بسيطة استايلي عباتي ونقابي p; *اوببااااا اي متنقبه D;*
ما احط ميك اب الا شي بسيط! . . شكلي بسيط جداً جداً و اللي شايفني بيعرف شقصد :$
ما احب اكشخ بمكان مو مناسب لهالكشخه . . خصوصاً الكلية!
غير ان هالشي ملفت احسه مو مناسب و متعب . . كافي ان شكلك مرتب و انت راضي عنه خلاص♥
و دامني لابسه هالعباة و هالنقاب راح احترم هالشي و الحمدلله قاعده احاول احترمه و اطلعه بصورة حلوة♥
فمو حلو ابد تحكم على الناس من شكله . . تعرف عليه قبل ماتحكم♥
و مو حلوه ماكأنج بلوقر هذي ههههههه ماني عارفه شالعلاقة بين الشكل و الاهتمامات!
انا معاج ان المفروض البلوقر تكون مهتمة بشكلها اكثر من احد ثاني بس همن المكان يأثر
و بالاخير انا انسانه لي مودي و ستايلي . . ابدا ماله علاقة p;
و بهالكلام رسالة لك : *لاتحكم على اي انسان من طريقة لبسه او كلام الناس عنه!*
و بالاخير . . سوّ كل شي حابه و تحسه صح و كمل فيه و حققه لنفسك و لأهلك و لمجتمعك
مهما الناس قالت عنك او عن هالشي اللي تطمح له ، مهما الناس حبطتك و حاولت تضعف من عزيمتك
خلك قوي و مؤمن بنفسك♥
و رسالة للناس اللي تمشي و تحبّط : ركز على نفسك و طوّرها و فكر ان كل شخص له اهتمامات
و ابدا لا تنزل من عزيمة اي شخص و تقتل طموحه بسلبيتك، كل شخص عارف لنفسه و حاب شي يحققه♥
اذا كنت مو قادر تشجع . . لا تحبط!
بالنهاية . . اشكر كل شخص كلمني عالدايركت و قال لي شكثر فدته، ماتتصورون شكثر افرح♥
اشكر كل شخص دعمني بكلمة . . كل شخص حبطني لأني قدرت اثبت بإني "مو مثل اللي فبالهم p;"
اشكر أمي ابوي اخواني رفيجاتي . . منال سارة ، اهلي♥
متابعاتي الجميلات♥ . . احبكم :*
:
جمييييييل البوست سارون كلامج صحيح ❤
ReplyDeleteحبيبتي انتي عيونج الجميلة تسلميلي :*
Deleteي زينج سارون يوم السعد الي جمعني فيج التدوين انتي و البنات ♡
ReplyDeleteعمري والله يازينج انتي . . يزيدني شرف والله♡♡
Deleteجميلة وكلامك جميل، قلتي كلام كثير بخاطري أقوله ، يعطيك العافيه
ReplyDeleteحبيبتي انتي الله يعافيج يارب تسلميلي عالطلة♡
Deleteالسلام عليكم خيتي
ReplyDeleteأقول لك شي؟ حبيتك أكثر لما قلتي انك تتنقبين :$
الله يثبتك ويخليك
ان شا الله ما نفقدك عن شر :*
وعليكم السلام . . ههههههه حبيبتي والله :$♡ الله يثبتنا جميعاً♡ فديتج شكراً :***
Deleteكلامك وصل للقلب
ReplyDeleteيعطيك العافية و معاك للآخر
وايد وايد وايد حبيت البوست
ReplyDeleteعفووووي بشكل ��
وهذا ان دل ف يدل على عفوية شخصيتج وجمالها
وايد حبيت ردج ع سؤال الي ياج بالاسك
حسيت افكارنا متقاربه ��
ويمكن عشان جذي انا متردده انزل بوستات اكثر
لكن فعلا اليوم تواجدي في البلوق مالج و قريته من اوله لي اخره
حمسني وايد و اكيد بكون دايما ف انتظار جديدج
بالتوفيق ��
يالله كلامك جا في وقتة ، وشكرا أديتيني دفعة معنوية كبيرة اقرا الكلام وسوي كابتشر😂💕
ReplyDelete