السلام عليكم و رحمة الله وبركاته♥ . . شلونهم؟ p;
اول شي شرايكم بالديزاين الجديد؟ عرفتوني ولا ههههههه P=
قولولي حتى لو مو حلو او فيه شي غلط :$
عادي اتقبل كل شي p;
هالموضوع بالذات ف بالي من زماااان زمااااان!
بس ماصارت فرصة الا الحين اتكلم عنه
بما انه ويكند و قاعدون بالبيت p;
نظرة المجتمع و الزواج . . و البنت اللي ماتزوجت "تكسر الخاطر!"
كلنا نعرف ان الزواج و العايلة نعمة لاتقدر بثمن
لكن مو معناة اللي ماتزوجت "يشفق عليها او تكسر الخاطر"
نظرة المجتمع مريضة مع احترامي لكل من يفكر هالتفكير!
حيل صادفت بنات تسولف عن بنت عمها او بنت خالها
و تقول : " حرام عمرها ٣٠ سنة وماتزوجت!"
ليش حرام؟
ليش هالنظرة هذي؟
مايمكن هاللي ماتزوجت اسعد مليون مرة من اللي متزوجة!
و اللي متزوجة تتمنى انها ماتزوجت
ليش تفكير الاهل حتى جذي؟
ليش دايماً يقولون (عقبال مانفرح فيج ونشوفج عروس)
ترى الفرحة مو بس زواج . . الفرحة ممكن تكون بنجاح بتخرج بوظيفة بفرصة تحصل لها بحياتها
او اي شي ثاني يفرحها شخصياً!
اوكي انا اقدر حيل تفكير الام و الابو ان يبون يتطمنون على عيالهم
و عارفه حيل هالشعور . . بس مايتم الضغط عليها بهالطريقة وتفقد ثقتها بنفسها عشان بس يتطمنون عليها!
« ساره تحمست ههههههههه
عاشرت صديقة لي عمرها ٢١ . . خالتها كل ماشافتها (نبي نزوجج وخلاص كبرتي)
تسولف لي : انها كرهت عمرها و حست ب ان ثقتها بنفسها مهزوزة
و انها عالة على اهلها ومثقله عليهم "مع انها صغيرة تعتبر!"
تقول عشان بس هالجملة تزوجت . . و لا قدرت اعيش معاه
و لا كنت متهيئة نفسياً ، من ثاني شهر تم الطلاق!
و المواقف بهالموضوع واجد واجد!
هذا غير النظرة الثانية اللي تغيرت بعد طلاقها!
للأسف يتم تشويه السمعة بشكل لا يصدق :|
(ليش تطلقت؟ ، ششايف عليها؟ .. الخ)
و لا يفكرون ان العيب ممكن يكون من الرجال . . مو من البنت!
اي ليش جذي ، الذنب عند الله واحد سواء من رجل او بنت
كافي تطميس للمرأة بهالطريقة البشعة!
غير صديقة لي تقول ان هالسنة تزوجوا تسعة من صديقاتها
و تطلقوا سبعة بظرف شهور و اعمارهم ماتعدت الـ ١٩!
شي محزن للأسف
عشان شنو؟ عشان الناس ماتقول عنا بنتنا ليش ماتزوجت :/!!!!
الزواج مو كل شي في حياة المرأه . . و اللي تشوف نفسها صغيرة
او مو بوقت مناسب تتخذ فيه قرار الزواج و هي مقتنعه ١٠٠٪ ان هالشخص يناسبها
افضل لها مليون مرة من انها تتزوج و هي مو مقتنعة عشان بس نظرة الناس لها!
و هالشي المفروض الاهل اللي يتأكدون ويكونون واعين بهالشي
( اذا بنتنا ما ارتاحت وماعرفته صح ولا قدرت تقرر انه يناسبها بعيداً عن اي شي ثاني )
نصيب بالاخير . . و نصيبها مو معاه!
المفروض نكون مجتمع واعي بموضوع الزواج♥!!
و ما ننظر للزواج بهالطريقة . . لانه بالاول و الاخير نصيب و ان ماتم فهو خيرة!
و الزواج هو استقرار عاطفي ونفسي و فرصة لتكوين الاسرة و نعمة الله رزقها فئة من الناس
و ان ماتم . . فهو خيرة له و لها
و الله وحده اللي شايف شنو الخير لنا و شنو اللي مايناسبنا♥
و كافي نكون راضين بقدرنا لان القناعة كنز لا يُفنى♥
و ان الله قسم لج هالنعمة . . لا تشوفين اللي ما الله رزقها انها ناقصه
لان بالاخير ماندري شنو ربي رزقها بحياتها و ماقسم لها زوج صالح♥
ما يمكن ربي ماقسم لها الزواج . . بس كتب لها سعادة في الدنيا و الآخرة♥
بنات كافي ننظر هالنظرة لخواتنا و لصديقاتنا . . سواء كنتي متزوجة او لا♥!!
سألت رفيجاتي شرايكم بنظرة المجتمع للي ماتزوجت :
* هاي بشاير p; : تقول ان الوضع تغير و ماصارت البنت اللي متزوجة حلا مع القهوة هههههه
يسولفون عنها و ليش ماتزوجت و اكيد فيها (بلاء) على قولتها p; و ان عادي لو تصير عمرها ٥٠
محد له شغل فيها
* هاي روان p; : تقول ان في شكثر بنات مايبون يتزوجون او مأجلين الفكرة لي بعد الماستر و زين يتزوجون
فالزواج صار شي مو مهم مثل قبل
* هاي فاطمة p; : تقول ان النظرة تغيرت و شكثر بنات يقولون مانبي نتزوج
* هاي حسنة p; : تقول ان صار الوضع عادي لو ماتزوجت مو مثل قبل
* هاي ريم p; : تقول بالنسبة لمجتمعنا حنا بالذات شي طبيعي يتكلمون حتى لو فضول بس الناس الفترة هذي
عموماً مايدققون نفس قبل و صار الوضع طبيعي
* هاي نوف p; : تقول ان فيه ناس عقليتهم للحين جذي و ان اكيد فيها شي لو ماتزوجت وبنفس الوقت في ناس مايهمها تزوجتي او لا و كل شخص بحاله
:
الحمدلله شي مبشر♥♥♥♥! ان شاء الله يكثرون هالناس اللي تفكر بهالطريقة
و تتغير نظرة الناس السلبية للبنت اللي مو متزوجة و تفكر بنفسها قبل اي احد ثاني♥
اذا كنا نبي نتطور و نطور بمجتمعنا . . لازم نطور تفكيرنا قبل اي شي!♥
شكراً لحسن الاستماع p;♥
و ناطرة ارائكم جميلاتي . . ب انستا او ببوكس التعليقات تحت او دايركت و اللي تبونه :$
ضروري اعرف كل رأي سواء انتي فكرتي بهالنظرة او لا♥!!
كونوا سعيدين ♥.♥
بدايةً أحب أهنيج على رايج الي اتفق معاه مليون بال ١٠٠
ReplyDeleteوايد من القراب لي بعمر صغير ١٩ و ٢٠ سنة متزوجين والبعض بالحمال الاول
ما اقدر اقول كلهم سعيدين
لكن بعضهم اكتشف انه الزواج مو كل الدنيا .. !
وبعضهم اكتشف انه ما يقدر يوفي بين الدراسة والبيت
وايد اشياء تأثر على قرار مثل هذا اهمها انه الشخص يكون واثق من هالخطوة و من الشخص الي بيرتبط فيه
اما العمر فيعتمد على شخصية البنت والرجل اذا كانو يقدرون يتحملون مثل هالمسئوليات
بالمقابل قاعدين نشوف ناس بالثلاثينات متزوجين بينهم خلافات جدا طفولية وما يعرفون يتصرفون
احس الموضوع يعتمد على رغبة الشخص واهدافه المستقبلية و وضعه
يعني العالم الخارجي مو محسوب بالحسبة والي اهوا المجتمع
لانهم ما راح يستانسون عنج ولا راح يتعبون عنج
ايضا اتفق وياج سالفة متى نفرح فيج تغث وللحين موجودة
والي تسمع هالكلمة من احد خل تقوله الحمدلله انا فرحانة بنفسي كل يوم ;q
حبيبتي هناج ربي ب طاعته :*
Deleteفعلاً الزواج مو كل الدنيا . . نظرة الناس و المجتمع اهيا اللي خلته جذي او صورته للبعض جذي!
صح . . يعتمد ع رغبة الشخص و احساسه ب انه قادر يتحمل المسؤولية
اتفق معاج ب كل شي . . شكراً لطلتج يا جميلة :***
كلام روعه اصلا اشلون تبون المجتمع يغير نطرته عن البنات اذا البنات نفسهم يتكلمون دايما ويذمون في البنات ويجوفون الرياييل دايما احسن اصراحه مجتمع فاشل وتفكير سطحي والمشكله ان اللى يتكلمون جذي دارسين وفاهمين لكن للاسف عادات وتقاليد مجتمعنا غلط في غلط مايهمهم الا العيب بس الحرام والحلال مايدرون عنه انا عن نفسي متزوجه وراح انفصل ومرضت نفسيا بسبب هالزواج والبنات اللى ماتزوجو مرتاحين ماشاء الله وفى النهايه كل شي مكتوب بيصير بس عموما احنا في البحرين تغيرت هالنظرة ووايد بنات ماتزوجوا وكونو روحهم بنفسهم ويعتمدون على روحهم بكل شي
ReplyDeleteصح ، مستحيل المجتمع يتغير اذا البنات نفسهم يطالعون بعض بهالنظرة!
Deleteللأسف هذا الحاصل . . الله المستعان و بنظل نحاول و نحاول بس عشان نغير لو شوي بس!
شكراً لتواجدج حبيبتي
اتكلمت بدا الموضوع بمدونتي قبل جد الحياة مو زواج ... الزواج مسؤليه كبييره لازم البنات يفهمو دي نقطه انا عايشه بمجتمع اكبر هم للبنت تتروج واغلبهم متزوجين وموسعيدين بس مصورين انهم سعيدين وفي بنات اتزوجو بس فاهمين الزواج غلط احس نحتاج دورات واعاده وعي بدا الموضوع لازم تصير حملات توعويه تفهم الزواج ايش هو ماهو فستان ابيض وزفه باسمك ماهو شهر عسل ونونو ماهو بس شغل بيت ، زواج رابطه مقدسه
ReplyDeleteصح صح! هذا اكبر هم و ناس يشوفون ان الزواج اهم من الدراسة او تكوين نفسها . . مو بس الرجل يكون نفسه حتى البنت و ما اتكلم عن التكوين المادي بس .. حتى بالنسبة للشخصية! الدراسة و الوظيفه توعي الشخص اكثر و اكثر . . للحياة سواء تزوج او ما تزوج! ، ، شكراً حبيبتي :*
Delete