السلام عليكم ورحمة الله وبركاته♥
. . . كيف الصبايا p; ؟
شرايكم باللوك الجديد :$
الروكاتين وما ادراك ما الروكاتين
اخيراً بعد جهد جهيد خلصته :|
بلشت فيه من شهر ١٢ تقريباً وخلصته من شهر♥
بالبداية
شنو هو الروكاتين ؟
هو علاج يمنع ظهور حب الشباب بنسبة ٦٠ إلى ٨٠٪
عبارة عن كبسولات صغيرة تختلف درجتها . . مابين ١٠ mg إلى ٢٠mg
الكبسولات تحتوي على مادة لزجة،فمادة الكبسولة الخارجية تشبه المطاط
بحيث تتفاعل مع الأكل في المعدة وتذوب وتخرج منها هالمادة
فعاليته ؟
تنشف الدهون اللي تسبب في ظهور حب الشباب في الجسم
و في البشرة تحديداً
كيف اعرف يناسبني العلاج او لا ؟
اذا كانت بشرتج مليانه حبوب .. ومافاد معاها اي علاج
+ اذا الحبوب تحسينها دهنية مو من مزاج او نفسية معينة
+ اذا ظلت معاج فترة طويلة ماراحت
شنو طبيعة بشرتي و ليش اخترته ؟
نوع بشرتي حنطاوية و كنت اعاني من الحبوب بجبهتي و بآقصى خدي
و آثار الحبوب كانت فظيعه :|
آثار عمر المراهقة ولما كانت تحكني الحبة كنت علطول اقشرها
و لما المسها وواجد اشياء غلط كنت اسويها .. كليتها الحين ههههههه
بالبداية رحت للدكتور وانا حاطه ببالي خلاص
مبلشه بهالعلاج مبلشه
بس انصدمت لما قال لي تحتاجين روكاتين هههههه
وطبعاً سارة ابداً ماصدقت علطول وافقت p;
شرح لي و قال كذا نقطة :
١. من تبلشين علاج راح تطلع لج حبوب اكثر
٢. بشرتج راح تجف حيل حيل
٣. مناطق حوالين العين + الشفايف اكثر المناطق اللي راح تجف
٤. لابد من الترطييييييب
٥. ضروري الماي،٨ اكواب يومياً عشان مايأثر عالكلية
خذيت تحليل دم لتحديد الجرعة المناسبة للعلاج
+ لازم تعرفين جم وزنج لتحديد الجرعة همن
حدد لي الجرعة بأول شهر 30mg
اول جرعة ٢٠ لوجبة الغدا، ثاني جرعة ١٠ لوجبة العشا
اول شهرين
بدت الحبوب تطلع اكثر،خصوصاً بجبهتي
اللي يشوفها يقول نمل مو حبوب هههههه
+ طلعت لي حبوب حمرا جنها ملتهبه
غير هذا..بشرتي جفت حيل حيل حيل حيل حيل :|
فوق ماتتخيلون
لدرجة لو بتكلم او اسوي تعابير وجهي الاعتياديه تعورني
واحسها جنها تشقق
طبعاً . . المتعب بالموضوع ان بس مرة وحدة ترطبين
هالشي اكثر شي تعبني،، يعني طبيعي اول ما اقعد من النوم احس بشرتي بتتشقق
ومتقشرة،اغسل بشرتي بالغسول اللي كاتبه لي الدكتور و ارطبه
عادي بالليل احس بنفس الشعور بس ما اقدر ارطب بشرتي :(
ثالث ورابع وخامس شهر
بدت بشرتي تتحسن اكثر وخف الجفاف معاي
+ الحبوب خفت حيل حيل
وكل الحبوب اللي كانت ملتهبة وطلعت من بعد اول شهرين
جفت واختفت كلياً
+ حسيت بشرتي افتحت . . وجهي نور ♥.♥
و حبوب كتفي اللي كانت ملتهبة خفت بنسبة ٦٠٪
ظلت بس الآثار
حتى الاثار خفت معاي و فتح لونها اكثر
آخر شهر
مثل ماقلت بأنستقرام عن موقفي مع بوتس
بس خل ارجع اقوله لكم للي ماقراها♥
سلمكم الله خلص مرطبي اللي استخدمه
- سيتافيل -
ماكان موجود نهائياً لا بالحجم الصغير ولا الكبير
فكرت بـ مرطب ثاني ( آفيان ) احبه وخفيف على بشرتي
وطبعاً الموظفة ناشبتلي p;
ابروح لرف آفيان،،نشبتلي اكثر وتمت معاي
وقالتلي افيان مش كويسة وماعرف ايش
طنشت وقالتلي طيب نوع بشرتج شنو عشان المرطب
قلت حساسة من علاج الروكاتين وطارت ههههههه
تقولي لا
انا : متوفر المرطب او لا ؟
هي : تحسس بشرتج اكثر مع العلاج
اوباااا :(
ودتني على رف fair&white
ماكان عندي وقت و كنت جد محتاجة اي مرطب يفي بالغرض
عطتني مرطب من فير اند وايت
سألتها مايسبب لي اي تحسس؟
و قالتلي لا وهو ميزته مِلكي ويرطب بشرتج مع الروكاتين لان بشرتج جافة وحساسة
وتحتاج المكونات اللي فيه
كان مكتوب عليه ( anti-ageing ) = مقاوم للشيخوخه
اوكي ميني عجوز بس مو لهالدرجة ههههههه :|
ما انتبهت له..ماصدقت علطول رجعت حطيته
عشر دقايق بس .. الله لا يوريكم !!
من بعد ماكانت بشرتي شبه صافيه من الحبوب
حمر وجهي + صار حااار + غابه من الحبوب
التهب حيل :|
التهب حيل :|
ثاني يوم رحت لدكتوري،و قال لي هالكريم كله دهن :|
والدهن اللي نشفناه مع علاج الروكاتين رجع
يعني الـ ٦ اشهر علاج
هالعشر دقايق نسفتهم لي للأسف !!
واضطر الدكتور يزيد من الجرعة شهر و صار بدال 30mg
صار 40mg
النتيجة النهائية :
بشرتي احلوت اكثر + الحبوب خفت معاي حيل
بنسبة ٦٠٪ الحمدلله
الـ ٣٠٪ من المرطب اللي استخدمته غلط
الـ ١٠٪ من الحالة النفسية او المزاج
حسيتها فتحت معاي،،الحين ركزت على علاج الآثار اكثر
و فكرت بكذا نوع تقشير،،بس لحد الآن مو عارفة شنو الافضل
و ممكن اسوي الديرما رولر . . بس ستل للحين ما ادري محتارة :$
حبوب ظهري اختفت اللهم لك الحمد،،هم باقي الاثار بس خفيفه شويتين
مو قوية الحمدلله نفس قبل
الآثار الجانبية :
١. اذا كنتي متزوجة او بتتزوجين قريب لازم ماتحملين الا بعد العلاج ب٦ اشهر او سنة
يعني بتصير المدة اللي ماتحملين فيها سنة او سنة ونص
لان العلاج يسبب تشوهات للجنين بعيد الشر عنكم.
٢. مايصير تتبرعين بالدم الا بعد العلاج ٦ اشهر او سنة حتى لان نسبة الروكاتين بالدم تكون عالية
٣. اذا مبلشة علاج ليزر ازالة الشعر او ناوية عليه ماينفع الا بعد العلاج ب٣ اشهر
٤. اي نوع ليزر ثاني هم بعد ٣ اشهر لان يسبب حروق
٥. جفاف فظيع
٦. الآم بالمعدة
٧. تقلبات في المزاج
خل اقولكم شنو اللي صار معاي بالضبط مع الآثار الجانبية
اكثر شي عانيت منه
الآم المعدة + تقلبات في المزاج
صارت معاي مشاكل وماصار لي خلق ومزاجي معتفس ٢٤ ساعة
ما اروق الا ايام معدوده
مع ان شخصيتي مو جذي نهائياً وراعية مزاج واجواء p;
فحسيت نفسي بهالشي تغيرت بس مو مني،،من العلاج
واللي شافني نفسية واللي يقول سارة تغيرت واللي واللي
فبما ان بعضكم بيشوف البوست...فعرفتوا السبب p;
من بعد ماوقفت حسيت طاقتي رجعت لي...واتوقع ملاحظين بفترة العلاج
مانزلت بوستات + نشاطي خف ب انستا وتويتر وحتى السناب
بس الحين رجعت بقوة الحمدلله♥
وليزر ازالة الشعر وقفته من بلشت و لحد الآن
مقررة بنص ١٠ ارجع اكمل الجلسة الرابعة
وحاطه ببالي ليزر مسامات البشرة هم بـ شهر ١٠
والجفاف مثل ماقلت لكم فوق♥
فإذا كنتي بنت ستل ماتزوجتي وعندج وقت تقدرين تبلشين فيه
واذا كنتي متزوجة لازم تمنعين الحمل سنة ونص عالأقل حفاظاً على صحة البيبي♥
بشكل مجمل،اشوفه علاج ممتاز لحب الشباب بغض النظر عن الأثار الجانبية
عيادتي كانت : عيادة الحمرا ..عند د.رضا
ارتحت مع العيادة الحمدلله ،، اسعارهم مناسبة
٢٠ فتح الملف والاستشارة ،، كل شهرين تحليل دم ب ١٠
اسعارهم حلوه مقارنةً مع العيادات الباقية
موقع العيادة ( هنا )
ان شاء الله يكون بوست متكامل ومانسيت شي معين :$
اذا عندج سؤال معين تقدرين تكتبينه تحت او بأنستقرام♥
دمتم سعيدين♥
دمتم سعيدين♥
0 comments:
Post a Comment