طاولتي الجديدة للمكياج وأشياء ثانية♥ :

السلام عليكم ورحمة الله وبركاته♥

شلون الجميلات♥♥!

الجميلات بسناب شافت طاولتي الجديدة معاي ♥

وشكثر فادتني وتعلقت فيها بصراحة

اللي حبيته فيها ان اشوف كل شي قدامي ما احتاج افتح الدروج

واقعد احوس بالاغراض اطلع هذا ويضيع هذا

قبل ما ارتب الطاولة كان مكياجي بدروج مع جم بوكس

كل بوكس كان لباكج للوجه . . للشادوز ، للحمر وهيك p;

كنت حاطه ببالي اشتري جنطة الميك اب البلاك

هذي :

بس سعرها كان مبالغ فيها من nyx

٥٠٠ دولار! يعني اكثر من ١٥٠ دينار

حسيت ان اوفر حيل سعرها على ميك اب :$ !

خصوصاً اني مو ارتست ولا لي مجال في المكياج كلش

مكياجي على قدي و زين احط لنفسي بعد ههههههه

مع ان شكل الميك اب فيها يشووووووق!

ويحمس الواحد يحط وهو يشوف كل شي قدامه بس مادري

يعني غير سعرها المبالغ فيها ماحسيتها عملية

كشكل بس

ففجأه فكرت ب اني اغير طريقة عرضي للمكياج

من غير مايكلفني شي ،، كلها اشياء موجودة بكل بيت!

فكرت فكرت فكرت

شفت قدامي . . مكتبي المبعثر ،، اوراق اهني و و اوراق هناك

شغل رونق ، لابتوبي . . شموع مكينة القهوة ، اكواب

. . . الخ

قلت ليش ما استغل المكتب بشكل كافي و يكون لي بجانبين مختلفين !

جانب شغلي و بعثرتي

و جانب مكياجي و اشيائي اليومية اللي احتاجها بكل وقت

نزلت المطبخ تحت و طرت علي كذا صحن امي مو محتاجته 

او بمعنى آخر ماتستعمله حيل . . الا وين ووين

استأذنت منها و وافقت ♥

صعدت وهم معاي ،، رتبت بعثرتي

غيرت مكان الطاولة خليته قبال الدريشة علطول

عشان يعطي شكل و اضاءة الشمس تجي مباشرة و يعطي انشراح وانا اشتغل

ويكون كل شي واضح

وبنفس الوقت استغله للتصوير لبوستات الانستا

فصارت هالطاولة لكذا شي و هذا اللي حبيته وحسيته مريحني♥

والشي اللي محلي المكان بعد

خليت ارفف كتبي جنب الطاولة،،، فصارت جلستي الشبه يومية♥

مثل ما انتوا شايفين ،، واضح ان الصحون استغليتها أجمل استغلال p;

الصحن الطويل اللي ورا اتوقع موجود بكل بييييييت ♥!!

هالصحون المحفورة هذي اقدر اقول هههههه

حبيت اقسمهم

اول صحن مثل اللي بالصورة ،، نصه بودر وكونتور وبرونزر،اسفنج

والنص الثاني برايمر وفاونديشنز برايمرز اضاءات كريمية

والصحن الثاني اقصى اليمين 

نصه الاول ماسكرات،ايلاينر،ماسكرة حواجب،قلترز

نصه الثاني اضاءات،بلشرز♥

الصحن الطويل اللي ورا

اكثر شي حابته،،،حسيت شكل الحمر جنهم حلاو هههههههه

حبيت يكونون مصفصفين جذي p;

الدرجات تكون قدامي ومو مضيعه منهم شي

لان اكثر شي يضيع بالدنيا وماله حل الحمر هههههه :(((

طبعاً ادري شايفين ماركات غريبه عجيبه عادي عادي p; 

اغلبهم من كومار p;

ماعدا الاطراف من ماك وسيفورا وكذا شي

الستاند من ايكيا قبل ما استخدمه لصبغ الاظافر وكذا شي 

كان لشموع عالمكتب ،، طبعاً كان له استخدامات واجد

مثل ستاند لحلا على سفرة القهوة،اي عادي لا تستغربون p;

انا باقي انام عليه عشان بس اطلع للشي استخدامات ثانيه هههههههه

صبغ اظافري مثل ماشفتوا اي شويه ادري :$

بس صفيت واجد آخر فترة،،اللي ناشف و اللي لونه صار خفيف و اللي لونه مدري شلون صاير

بس مفكرة بالشحنات الجاية تكون في مجموعة مجموعة،، و من هذا المنبر

لو في سايت متخصص بهالشي واسعاره حلوه فيديني فيه♥

مادري شصاير معاي،،صرت اكره اروح السوق بسبة الاونلاين :|♥♥♥

الميني ميسن جار♥

كانت عندي مجموعة مفكرة فيها لرونق لعيد الاضحى

وقلت ليش ما استغلهم للفرش $:

مجموعتي من فرش ريل تكنيك

و كوستال♥ و طرف من الاكحال و الماسكرات

« ياكثر ماسكراتي ادري p;

جانب من الباليتات♥

شموع من ايكيا تحت ستاند صبغ الاظافر والاشياء الثانية

حبيت فكرة اني انظفها من الشمع واستخدمها للأشياء الصغيرة

مثل الرموش ، العدسات ، البنس واشياء ثانية♥

.

الجانب الثاني من الطاولة :

الجانب الثاني حبيته يكون لشغلي اليومي 

بعض من كتبي ، اكسسواراتي ، اشيائي الشبه يومية

جانب من السي ديات لشغلي♥

*حرف سين اللي اقصى الصورة فوق طنشوه طيب هههههههه*

اخوي ماقصر بفنونه عليه $:

علب الاكسسوارات حسيت تعطي جمال للطاولة + تحفظ الاكسسوار اكثر 

و يكون قدامي ما اضيع مكانه بين العلب الثانية♥

بعض من كتبي

حبيت بكل مكان يكون لي كتاب 

لاني حالياً قاعدة احاول ارجع عادة القراءة لي

كنت قارئة جيدة بأيام الثانوي ، قبل ٣-٤ سنين

بغض النظر عن نوعية الكتب اللي كنت اقراها الا انها كانت متعة لي بشكل !

على فكرة كنت اقرأ كتب تطوير الذات و كتب تخص علم النفس

مع شوية روايات

بس دخلت الكلية،انشغلت معاها وتدريجياً ماصار للقراءة عندي هاجس او شي مهم

عكس قبل

فحالياً قاعدة احاول اخلي اي مكان اكون قاعدة حوله

يكون لي كتاب واحد عالاقل

لاني قاعدة احاول اشد انتباه عقلي للكتب و ما اخلي الفون هو المستنفذ لوقتي بس

فأنزل مرة الصالة القى كتاب قارية منه جزئية حلوة اسويلي قهوة اخلي الفون جنبي شوي

واكمل الجزئية

اصعد بعد ما اخلص شغلي وانجزه

و اشوف كتاب ثاني ماقريت فيه شي بس افتحه واقرأ منه كم صفحة

بخمس دقايق اكون قارية منه ٦ او ٧ صفحات بتمعن وتركيز

وهكذا♥

صورة أخرى♥

مانستغني عن الشموع طبعاً♥

تفاصيل الطاولة :

* طاولة مكتب من ايكيا

* صحون مختلفة لون أبيض او أي لون حابته

* ستاند صبغ الاظافر من ايكيا

* شموع مختلفة من باث اند بودي

* ميسن جار من محلات مختلفة بالشويخ

.

ان شاء الله يكون البوست ملهم لكم لترتيب طاولتكم اليومية وتستغلونها من كذا جانب يريحكم♥

و بأقل التكاليف طبعاً♥

دمتم سعيدين♥

4 comments beauty, reviews