تفاصيل تجهيزات عرس اخواني♥ | بين سلبيات وايجابيات :

السلام عليكم ورحمة الله وبركاته♥

مثل ماوعدتكم..هذا هو بوست التجهيزات♥

كنت غاطة ٣ شهور من بداية السنه تحديداً الى تاريخ العرس p;

وبعدها اسبوعين راحة هههههههه

العرس كان لـ اخواني الاثنين الله يهنيهم ويتمم عليهم يارب ويهني الجميع♥

وبما ان العرس لمعرسين فكان التعب مضاعف،بس الحمدلله ربي تممها♥

البداية كانت بتحديد الصالة والتاريخ .. حددنا العرس قبله بسنة ونص تقريباً

لان العروس صايرة بالكويت بمواسم بس ، وبشهور معينة بالسنه تكون على الصالات ضغط

تحديداً شهر مارس وابريل !

التاريخ :

حددنا التاريخ ٤ مارس يوم الجمعة لعرس الحريم♥

اختار اخوي عرس الرياجيل يكون قبل عرس الحريم بيوم 

بالبداية الكل عارض الفكرة،وان الشعور بيكون مختلف

ومحد راح يحس بشعور العرس اذا ماكان بنفس اليوم و و و 

بس بعدها جد حسينا انها فكرة ممتازة بعد ماطبقها ! جداً ممتازة

الحلو فيها :

ان المعاريس عموماً بهاليوم يكونون متوترين جداً جداً + تعابى

فيفكرون شلون بيكون عرس الرياجيل وشلون بيدخل على الحريم ويفكر بعروسته وغيرها من الاشياء

اللي تخلي متوتر طول العرس

فلما يكون يومين..يكون مرتاح اكثر بدخلته♥

بصراحة اخوي ماكان يفكر بهالطريقة،كان مختار يوم خميس وبس

وطبعاً الحريم يحبون يوم الجمعه بدون دوامات p;

فاصرينا يكون يوم جمعه وهو اصر يكون خميس $:

بس بعدها حسينا ان الفكرة مريحة جداً + بعرس الرياجيل كان مرتاح ومستانس

بعكس لما يكون بيوم واحد فيكون التعب مضاعف وحوسه p;♥

بعدها بعض الناس صارت تطبق هالفكرة،ومافيها عيب حتى!

اشوفه مريح للمعرس واهله♥

القاعة :

امي اختارت تكون الصالة "القاعة الملكية بمشرف"

معروفه ومشهوره بالكويت واغلب الناس تحبها لان كل شي فيها

من ضيافه وحلويات وقاعة فخمة جداً ومناسبه للي حضورها واجد♥

سبب اختيار امي للقاعة انها مريحة من ناحية الديكور + الضيافه + الحلويات + البوفيه

كل شي عندهم توب

بالبداية حسينا انها مريحة بس بعد ماقرب العرس ثبت العكس :\

غير سعرها المرتفع بالنسبة للصالات الثانيه او حتى للفنادق!

كل شي ممكن تزيدينه بالقاعة عليه رسوم

مثل : رسوم الكوشة + رسوم البيست + رسوم الزوم + رسوم الاضاءة

+ رسوم التفتيش بالنسبة للكاميرات والاجهزة 

وغيرها من الاشياء اللي انصدمنا منها!

المفترض ان كل هالاشياء تكون من ضمن المبلغ عشان الواحد يحسب حسابه

مو بعد مايتم كل شي وبيومها تبدأ الحسابه تحسب!

تحسفنا على الاختيار للاسف :( 

وحسينا لو اخترنا صالة وبدعنا بالديكورات والكوشه بتكون اقل كمبلغ من القاعة الملكية

واحلى بعد♥

صور القاعة :

وفي صور اكثر بس بعضها قدم لان جددوا كم شي♥

ونسيت اوضح ان في كوشه من الصالة مثلها بس ماحبيناها 

والموحلو بالنسبة للقاعة بعد ان لازم تدفعين ألف دينار كتأمين

على : 

* الحضور الزيادة على العدد اللي محددته من اول

الشخص بـ ٢٠ دك ، بحدود ٢٧٠ ريال!

يعني لو زادوا الحضور ٥٠ شخص زيادة يروح التأمين كامل

+ على الفنجال لو انكسر + التحف والاثاث لو صار كسر او تلف له
يعني لو الضيوف كسروا طاولة مثلاً او فازة مضطرة تدفعين
و بهالـ ٢٠ دك يحسبون ارضية الكرسي + البوفيه
مع ان البعض بس يسلم ويوجب ويطلع..بس اي شخص يدخل القاعة
مهما كانت طول المدة اللي بيظل فيها هم بينحسب عليها
بس كمجمل و كطلة لج ولضيوفج طبعاً احلى
لكن كمبلغ جداً مبالغ فيه الى ابعد حد
وممكن بحزتها لو عندنا خبرة كصالات وديكورات 
ممكن قدرنا نضبط صالة عادية ونخليها كأنها قاعة كبيرة
بأقل من نص المبلغ المدفوع♥
بالنسبة للبوفيه ماعليه كلام متنوع وفيه كورنر للباستا 
و بأصناف مختلفة
اما الضيافة فممتازة مع ان صار بطيء شوي
بس كأصناف من حلويات وموالح فحيل لذيذة♥

بالنسبة للكوشة،ممكن اكثر شي ضلينا محتارين عليها
كنت حابه شي بسيط بس يكون فخم
شلون ما ادري ههههههه
ماكنت حابه فخمة مثل فخامة الصالة عشان لا تعطيني ستايل قصر او قلعة
ما ادري شلون اوصف صراحه هههههه بس ستايل الصالة يوحي بجذي
اتفقنا مع مصمم لبناني على الكوشة والبيست
البيست : اللي هو المكان اللي يرقصون فيه بحيث يرتب الصالة اكثر
ويكون مرتفع عن الارض بشويات..عشان يبرزون اكثر
ان شاء الله قدرت اشرح عدل ، هالايام صاير الشرح عندي زيرو :$

صورة الكوشة من تصوير سناب للاسف

كنت ماخذه معاي الكام وقلت ماراح اخلي فتفوته ما اصورها
بس ولا ادري عن شي حزتها..لا كام ولا حتى نفسي p;
اللي يمسك العرس كتنظيم وترتيب..جد ينسى نفسه
من بدأ العد التنازلي من شهر يناير وانا فعلياً ما انام
احاتي كل شي،،غير ضغط الكلية كان اخر كورس دراسي لي
قبل الميداني..ففعلياً كنت شبه منهاره هههههههه
بس الحمدلله♥♥♥♥♥
تصميم الكوشة كان بسيط جداً..اخترت يكون اوفوايت
مع ديزاين الفازات بوقتها كان حيل دارج♥
فحبيت الكوشه تكون عالموضة + بسيطة + الفخامة تكون بالفازات والورد
و من الاكسسوارات اللي حبيناها مع الكوشة
على كل طاولة مثل آخر الصورة لو ملاحظين
" صينية ذهبية فخمة مع ورد بنفس لون الكوشة"
+ صحون فخمة للعلك على كل طاولة♥
سعر الكوشة مع البيست والاكسسوارات كان مناسب تقريباً
لان مثل ما قالت لي صديقة لي ان بالمملكة اغلى حيل الكوش عندهم
وانصدمت ان كوشتنا كانت بهالسعر..بس عن نفسي ماتوقعت جذي :\
بس الحمدلله كان يستاهله♥
بإذن الله راح احط التفاصيل بآخر البوست♥

نجي للدعوات
هذا بالضبط اللي كنت مهتمة فيه جداً جداً جداً
لان الدعوة هي اللي تبين اذا العرس فعلاً متعوب عليه او لا♥!
كنت مفكره مبدئياً اني راح اصممها بثيم مفتاح مع ورد بارز بطريقة معينة
بحيث ان شكل المفتاح يوحي انه مفتاح دخول للعرس او الفرح p;
تفاهمت مع منفذ ما،بحيث ينفذ لي الفكرة اللي فبالي بس للاسف ماعرفت اوصف له
كان يوريني ويرسم لي تصاميم جداً عاديه،وانا نهائياً ماكنت افكر بدعوة عادية
ممكن الاغلب يهتم بتفاصيل اخرى..اهم من الدعوة ويكتفي بدعوة الوتسب مثلاً
او بتصميم فيديو
بس على العكس معاي..كان ضروري كرت الدعوة
 ومن الدعوة نفسها اقتبست فكرة لفيديو الوتسب♥
بالصدفة :
وحنا طالعين من هالمنفذ..او من المطبعة 
اختي طيحت كرت من غير قصد كان بارز بفترينة محل..ونهائياً مافكرنا ندخله!
بس من هالكرت قلنا خل ندخل نشوف p;
المحل من برا جداً عادي بس من دخلنا..كل تصميم احلى من الثاني!
احترت صراحة..مابين تصميم فكتوري ومابين التصميم اللي اخترناه
وصار الجمع على دعوتنا الحمدلله♥

فكرة الدعوة ؛ جنطة محفور عليها بالليزر باللون الذهبي كل التفاصيل
حبيتها جداً..عطتني الفخامة مع البساطة اللي كنت ابيها
لمسة الفخامة لابد تكون موجودة..عشان تكون الدعوة غير
او الحفل بشكل عام غير♥

 اخترنا الوان ورد الكوشة مثل الوان الدعوة نفسها
بحيث نربط مابينهم..ممكن ماتكون مبينه بس مع الملاحظة والتركيز 
تبين هالتفاصيل الصغيرة♥ ومن هالتفاصيل الصغيرة تبيّن الاشياء العادية
من الاشياء الغير عاديه او الاعتيادية

فكرة الجنطة حسيتها جديدة ومميزة اكثر من الكرت العادي والكتابة البارزة!
لون الخلفية كان ممكن تتغير الى التيفاني بس اخترنا الاوفوايت المايل على بيج
عشان مانطلع حيل عن ستايل القاعة
وعشان الربط مابين التفاصيل يكون اسهل♥

الجنطة من داخل فيها كرت سميك محفور عليها بالليزر باللون الذهبي
تفاصيل العرس كاملة♥
مع مغناطيس صغير بحيث تتصكر الجنطة بشكل اسهل
عكس الفتحة اللي تنقص بوسط الكرت عشان يدخل الطرف الثاني منه
حبيت كل التفاصيل وحسيتها مميزة مادري،انتوا شرايكم؟

كل جنطة او كرت داخلها بطاقة شخصية♥
بحيث الكرت الكبير للأم مثلاً والكروت الصغار لبناتها
افضل من اني اوزع كل كرت لكل أم وبنت

الجنطة الحبة كانت بدينار مع بطاقتها واكيد عنده تصاميم اكثر♥
بآخر البوست التفاصيل ان شاء الله

النفنوف :
هم كل بنت..وهم اكثر لكل اخت معرس
كنت ما افكر الا بطلة غير ومختلفة عن اي عرس حضرته او كان قريب لي
واصعب شي..ان مابي فكرة اخت المعرس لازم تلبس هشك بشك ههههههه
بوقت العرس تحديداً من بداية سنة ٢٠١٦
كانت موضة الشك من..الى
والنفنوف اللي مجرد فكرة وقصة..كان منقرض وقتها ههههههه
لان حزتها كنت اشوف احاول اعرف شنو الموضة 
كله شك..كله سلاسل..كله الوان
بالبداية على كرهي للشك جد..بس فكرت بنفنوف عند المصمم ظاهر باقر
على ان تصاميمه كله شك من فوق لتحت
بس في نفنوف قتلني من جماله :\ يمكن كنت بموت لو ماخذته ههههههه
عاد اخت معرس وتحوس من شهرين ولقت شي يعجبها يعني خلاص
لونه كان بيبي بنك على كريمي والشك بنفس اللون على تدرجات رمادي
ما اعرف اشرح بس جدياً كنت ابيه 
والسبب الوحيد اللي كان مخليني مترددة هو سعره!
كان بـ٩٥٠ دينار يعني الف الا :| فوق ١٣ الف ريال
فكرت : بإني لو احضر عروس جد واعرف احلل النفانيف اللي اشتريها
وما البسها الا مرة وحدة يمكن شريته وعادي 
لان ادري راح ينلبس مرة ومرتين وثلاث،بس كلش ما احب العروس p;
اتوقع بهالفترة ماخليت مصمم مارحتله..ابتداءاً من الجسمي لظاهر باقر
لهيفا العتيبي لوسمية الحربي..الخ

بس جد..ما ارتحت الا عند مصممة وحدة بس♥
"اعتدال الحميدي"
كان تصميم خاص حسب قصة الجسم 
بالبداية قبل دفع العربون وكل شي 
شافت جسمي وقالت لي شمحتاجه وشنو ممكن تخفي وشنو ممكن تبرز
وشنو الالوان المناسبة لـ لوني ويعطيه نور 
حتى تفاصيل العرس كصالة واسماء العروسات وعايلاتهم!
لان طلة القاعة الملكية او الفنادق عكس طلة الصالات العادية
وبالنسبة للاسماء عشان لو في طلب تصميم من طرف وحده من العروسات
تحاول تبعد التصميم عني وعنها حتى لو شي بسيط 
بمعنى تصميمي مايشابه تصميمها بأي طريقة كانت،حتى لو الالوان
كنت حيل مترددة..الى ابعد حد
وما احب ما اشوف الموديل قدامي سواءاً على طبيعة او كرسمة او صورة
اياً كان..بس من شرحها وتطمينها لي ومحاولة توصل لي الفكرة اللي فبالها لي
تطمنت نسبياً p;

تصميم نفنوفي كان عبارة عن قصة فقط مع خامة مشجرة
لكن مو مشجرة يعني موردة .. لا كانت غريبة!
وتداخل الالوان مثل البترولي مع السلفر والذهبي شي عجيب
مع اضافة فكرة للاكتاف + شك خفيف على الاكتاف + حزام مشكوك
كنت اقولها لو تضيف شك اكثر بس قالت لي انتي صغيرة جذي كافي هههههه

حيل حبيتها..مريحة بالتعامل جداً وتاخذ وتعطي معاج
تصميم الوالدة كان خرافي♥ طلتها اللهم بارك كانت غير مع لمسات اعتدال
خامة قولتشي اند قبانا مع قصة بلون البيبي بنك ببيج 
وهي تشرح للوالدة ابداً ابداً ماتخيلت تكون النتيجة بهالجمال♥
١٠٠٠ الحمدلله♥
غير جذي حيل حريصة ان التصميم يكون لج فقط لحالج
حتى واحنا نقايس القطعة كانت تحرص مانطلع للزبونات 
بحيث ان التصميم لج فقط لحالج ومايحق لأي احد يشوفه قبل المناسبة
اسعار التصميم من ٤٥٠ دك
وعندها نفانيف جاهزة بالاتليه♥

التفاصيل الصغيرة اللي تخص الحفل :
١- المطرب كان : بدر الصالح ، ماعليه كلام ابداً♥
٢- الميك اب كان : من صالون فاطمة ستايل ، الحمدلله كنت موفقه في اختياره :|♥♥♥♥
٣- اشياء مهمة تاخذينها معاج القاعة : 
" كعب ثاني - بدلة مريحة - اساسيات الميك اب مثل بودر وفاونديشن وحمره مثلاً-
ابرة وخيط - مقص - صمغ رموش - بنس - محلول عدسات - عدسات ثانية - كام اذا بتصورين -
بخور - عطورات خاصة بالصالة و شخصية - بخور - صبغ اظافر احتياطي..الخ" 

نصيحة اذا كنتي اخت او ام معرس مشرفة على المطرب او الـDJ :
امنعي اغاني القبايل والعوايل بالعرس..منعاً باتاً :\
الحمدلله منعنا هالشي بالعرس واخترنا فقط لأم المعرس - خواته - عماته - خالاته
فقط
و ممكن بآخر العرس او قبل الزفة تضيفين اغنيه لصديقات ام المعرس بس p;
لان للاسف هالاغاني هي اللي تبيخ العرس..وماتخليه مرتب
وبيصير الحفل كله القبيله الفلانيه و العايله الفلانيه
وسرى الليل وحنا ماسرينا p;

\

مصمم الكوش : أ. أحمد \ ت: ٩٩٣٧٩٤١١
محل الدعوات: أ.محمود\ ت: ٩٠٩٨٩٩٧٦
صالون فاطمة ستايل: أ.فاطمة\ ت: ٢٥٦٦٦٣٣٣
القاعة الملكية أ.أبو أحمد\ ت: ٩٩٢٠٤٩٣١

:
وبجذي خلص البوست بكل تفاصيله
ان شاء الله قدرت افيدكم واقول التفاصيل اللي تهمكم او ممكن تساعدكم♥
مافي ولا نتفه دعاية،ومتابعاتي اللي يعرفوني من قبل يعرفون ما احب الدعايات بجذي تفاصيل
او بالمجمل حتى لو بأعلن مايكون بمقابل مادي..فهيك يعني p;♥♥

\
ابداً ابداً لا تشيلين هم شي..اهم شي تختارين شي يكون بسيط وذرب فقط
والحلو ان تعرفين شنو الموضة بكل شي وتتابعين اكاونتات المصممين
مثل مصممين الكوش والنفانيف وتاخذين فكرة بكل شي♥
قبل ماتقررين..وفكري بأنها ليلة من ساعتين ثلاث وحتى لو اربع
ولا تسوين نفسي توترين عمرج p;♥
واعتذر عالتأخير♥
لأي سؤال لا تترددين :*♥

7 comments reviews, talk